Stok Aimoruk Iha SAMES Menus

Diretor Ezekutivu Konsellu Diretivu SAMES, Santana Martins. (Photo: STL News)

DILI, STLNEWS.co – Stok aimoruk iha armajen SAMES menus, maibe nafatin iha pozisaun aimoruk stok ne’ebé iha 28,2% maka SAMES hasoru hela, maibe SAMES nafatin halo esforsu no horseik hetan tan aimoruk vital balun, atu utiliza ba iha parte ICU nian.

“Situasaun stok aimoruk iha ita nia armajen SAMES menus los duni, i sei mantein nafatin iha pozisaun aimoruk stok ne’ebé maka iha hamutuk 28.2%, ne’ebé maka SAMES hasoru hela, maibe ami halo hela esforsu no horseik konsege hetan tan aimoruk hanesan mos Farin, ne’ebe maka vital tebe-tebes utiliza iha parte ICU nia, konsege lori ona ba HNGV tanba ida ne’e maka ami hanoin asuntus sira seluk nafatin esforsu, espera katak situasaun ida ne’ebé maka agora dadauk iha ne’e ami bele ultrapasa,” lia hirak ne’e hatoo husi Diretor Ezekutivu Konsellu Diretivu SAMES, Santana Martins, ba jornalista sira iha fatin SAMES, Kampung Alor, Sesta (21/08/2020).

Tanba agradese Ministériu Finansas (MF) bele fo tan apoiu oituan millaun $1.8 hodi bele ami kontinua halo prosesu aprozionamentu, tanba ne’e maka ami halo hela esforsu oinsa maka aimoruk sira ne’ebé maka hanesan sai preokupasaun katak stock out iha SAMES bele esforsu no halo prosesu ruma, ne’ebé maka lais para bele hetan aimoruk sira ne’e.

Nia haktuir, aimoruk sira ne’ebé maka kategoria vital ne’e, nafatin iha stok ne’ebé maka 13 item ne’ebé maka iha semana kotuk relata agora hatun fali ba 12 item, ne’ebé husi 54 item ne’e katak, husi esforsu sira ne’e bele taka dadauk ona, maibe problema ida maka iha rai laran dala ruma farmasia sira iha apotik privadu sira ne’ebé maka durante ne’e iha kontratu ho SAMES, dala ruma sira rasik mos stok laiha, sira balu hakarak halo esforsu liu husi ita nia area terestre, maibe nafatin iha difikuldade tanba dala ruma transportasaun iha sira nia rai laran mos difisil oituan.

Maibe ida ne’e sei esforsu maximu no nafatin fo sai ba informasaun ne’e ba publiku para bele akompaña, tanba difikuldade laos iha ita nia rai laran, maibe iha fatin seluk mos sei difikuldade.

“Ami kontinua komunika ho fasilidade saúde sira bainhira stok aimoruk ne’e menus ona, tenki informa mai dirasaun nasional farmasia, maibe desizaun ikus ne’e HNGV bele ona hato’o pedidu diretamente mai iha SAMES, para atu habadak ita nia birokrasia tanba ita nia intensaun katak, prosesu habadak ne’e para karik stok aimoruk ne’e laiha bele buka solusaun halo nusa bele hetan lalais, tanba dala barak maluk sira ba aimoruk laiha, ho situasaun ida ne’e ita senti preokupa tebes” tenik nia.

Reportajen: Natalina Lopes

Editor: Ekipa STL

LEAVE A REPLY

Please enter your comment!
Please enter your name here