Atleta SKIFTL 347 Ezame Sae Sintu

Atleta Shotokan Karate-do Internasional Federasaun Timor Leste (SKIFTL) hamutuk 347, neebe mak kompostu husi dozo 17 iha munisipiu Dili, no mos reprezentante atleta nain 6 husi Suai ezame sae sintu. (Photo: STL News/Maria Tavares)

DILI, STLNEWS.co – Atleta Shotokan Karate-do Internasional Federasaun Timor Leste (SKIFTL) hamutuk 347, neebe mak kompostu husi dozo 17 iha munisipiu Dili, no mos reprezentante atleta nain 6 husi Suai ezame sae sintu. Kestaun nee hato’o husi Prezidente SKIFTL Antonio Carlos, ba STL iha Formoza, Dili, Domingo (30/08/2020).

Nia dehan tuir planu kada organizasaun Karate iha barak maibe Shotokan nian kada tinan halo ezame dala rua, tamba nee mak ba 2020 nee ba primeiru trimestre nee tuir lolos halo iha fulan Junnu liu ba, maibe tamba moras Covid-19 entaun adia fali too ohin loron. Halo ba ohin tamba importante ba Timor Leste nia ukun aan neebe iha 1999, ema hotu hotu Timor oan hodi disidi distinu Timor nian, tamba nee foti loron hodi sai istorika hodi relembra fali saida mak akontese 1999, ida nee ho fo esperitu ba atleta sira hodi treinu hanesan uluk ita luta ba ukun aan.

“Ita fofoun iha programa iha munisipiu nee tolu ka haat hanesan nee, atu mai partisipa iha Dili hanesan Maliana, Suai, Lospalos, ho Aileu maibe ikus mai tanba implika ba orsamentu ba trasporte ba mai, nunee so Suai deit mak reprezenta ema nain neen mai tuir ezame iha nee tolu, seluk husik nasional mak fo ezame iha neeba. Total atleta ba ohin loron neebe mak ezame nee 347 “tenik nia.

Iha fatin hanesan treinador SKIFTL, Jhon Baptista Freitas hatete nudar treinador tenke prepara kolega estudante sira treina ho kualidade neebe diak. “Tanba ita treina nee ita tenke tuir nia sistematika, para labarik nia daya tangkap nee ita buka nia mekanizmu oinsa para ita bele hanorin sira diak, para sira bele hatudu sira nia prestas, entaun ita tenkeser treina makas mai husi uma para atu aprende” tenik Jhon.

Nia hatete hanesan treinador tenke iha disiplina uitoan, tenke fo sansaun ba sira nudar, treinador tenke monitor kontaktu ba sira nia inan aman, se nia oan iha uma mak keta halo nia barukten, karik tenke monitor mai para bele fo sansaun, iha nee para ba iha uma nia inan aman haruka karik nia bele halo tuir.

Nia relata antes atu tuir ezame tenke ser treina iha fulan 6 nia laran, tenke treina ho diak depois ho nia komportamentu treina disiplina. La disiplina, ita tenke fo sansaun para hanorin sira para sai hanesan ema neebe iha prestasi para bele hetan iha eventu nasional. Kuandu sira hetan ona juara iha kompetisaun ida, kompetisaun internasional iha karik sira bele tuir.

No mos konaba ezame sae sintu nee mak hanesan sintu mutin, kinur, matak, azul. Sintu mutin hamutuk 155, kinur 79, matak 60, azul 53.

Nunee mos atleta SKIFTL, Denciana Diaz hatete, hanesan atleta Timor oan ida sente kontente tebes tanba ohin loron bele partisipa iha ezame ba Primeiru Trimestre nian ba sae Qiu. “Hau sente kontente, agradese ba Maromak tanba ohin halao ezame ho diak” tenik Denciana.

Reportajen: Maria Tavares

Editor: Ekipa STL

LEAVE A REPLY

Please enter your comment!
Please enter your name here