KM Aprova OJE Tinan 2021 Billaun US$1,6

Ministru Prezidensia Konsellu Ministrus (MPKM), Fidelis Leite Magalhães. (Photo: STL News/Alberto Menezes)

DILI, STLNEWS.co – Governu liu husi enkontru Konsellu Ministru, aprova projetu deliberasaun neebe mak aprezenta husi Vise Ministra Finansa, Sara Lobo Brites, kona ba tetu agregadu no dezagregadu Orsamentu Jeral Estadu 2021, hamutuk billaun US$1,6 nunee bele kobre programa sira neebe define ona husi planu VIII governu konstituisional iha tinan 2021.

Tuir Ministru Prezidensia Konsellu Ministrus (MPKM), Fidelis Leite Magalhães katak iha reuniuan Konsellu Ministru rona aprezentasaun konaba tetu Orsamentu Jeral Estadu (OJE) tinan 2021, neebe hanesan tetu preliminar ida, tanba faze sira sei tuir mai hanesan KROP ho Lina Minesterial sira neebe sei halo ajustamentu.

“Tanba nee ohin Konselu Ministru deside ona katak ita avansa ho Orsamentu Jeral Estadu (OJE) tinan 2021, ho montante billiaun US$1,6,” dehan Ministru Prezidensia Konsellu Ministrus (MPKM), Fidelis Leite Magalhães iha Palasiu Governu, Dili, Kuarta (02/09/2020).

Nia dehan, Orsamentu Jeral Estadu (OJE) tinan 2021 ho montante billiaun US$1,6 nee sei kobre ba nesesidade programa no prioridade nasional sira neebe defini ona husi VIII governu konstituisional.

Ho nunee sei implementa liu ba nivel dezenvolvimentu kapital sosial, dezenvolvimentu ekonomika, ho medida sira neebe integra planu rekuperasaun ekonomika ba dezenvolvimentu infraestrutura bazika fundamental sira, dezenvolvimentu ambiental, dezenvolvimentu instituisional ba prosesu reforma instituisional neebe lao hela.

Reportajen: Alberto Menezes

Editor: Carme Ximenes

LEAVE A REPLY

Please enter your comment!
Please enter your name here