Pasiente Covid-19 1 Rekopera Hikas

Diretora Kordenadora Jeral Komisaun Prevensaun ba Covid-19, Odete Viegas. (Photo: STL News/Domingas Soares)

DILI, STLNEWS.co – Pasiente pozitivu Covid-19 nain 2 neebe iha sala izolamentu Vera Cruz maibe, ohin Ministeiru Saude (MS) deklara hikas pasiente pozitivu Covid-19 nain 1 rekopera hikas hodi fila ba familia.

Tuir Diretora Kordenadora Jeral Komisaun Prevensaun ba Covid-19, Odete Viegas, dehan deklara ba publiku katak pasiente pozitivu covid-19 neebe iha izolamentu Vera Cruz nain 2, pasiente primeiru tama iha loron 20 fulan Agostu depois nain ida seluk tama iha loron 26 fulan agostu.

“Tanba nee ohin hau hakarak informa ba publiku katak, husi pasiente nain 2 nee ida tama primeiru ekipa husi laboratorium halo fali teste dala 2 tuir-tuir malu husi rezultadu hatudu negativu hotu tanba nee, ohin ita fo sai nai husi fatin nee hodi intrega hikas familia,” dehan nia ba jornalista sira iha fatin izolamentu Vera Cruz, Sesta (04/09/2020).

Nia afirma, agora dadaun iha fatin izolamentu Vera Cruz hela pasiente Covid-19 nain ida maka sei baixa no halo ona teste dala 1 maibe, ho nia rezultadu teste laboratorium sei nafatin pozitivu.

“Entaun ita sei hein fali too loron 4 ka 5 depois maka halo fali teste ba nia, bainhira husi rezultadu teste maka hatudu negativu no sei repete tan halo test too dala 2 maka nafatin ho rezultadu negativu hotu maka, ita foin bele fo sai pasiente nee,” tenik nia.

Nia tenik, pasiente neebe rekoperadu hikas husi moras Covid-19 aumenta ba nain 26 iha Timor Leste, alende nee atu afirma kona ba servisu neebe presta iha fatin izolamentu lao tuir nafatin regras ida neebe iha.

Nia hakotu, tanba nee husu ba entidades hotu hotu atu nafatin prevene aan tuir regras neebe MS ho OMS fo tiha ona, atu ema idak-idak kuidadu ninia aan hodi halo nafatin medidas preventivas atu bele hases aan husi moras Covid-19 nee rasik.

Reportajen: Domingas Soares

Editora: Carme Ximenes

LEAVE A REPLY

Please enter your comment!
Please enter your name here