PR Lú Olo Agradese Arcebispu Neebe Apoiu EE

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika (PR) Francisco Guterres Lú Olo hatoo agradese ba Arcebispu Metropolitanu, D.Virgílio Do Carmo Da Silva, tanba apoiu ona estadu emerjensia.

Kestaun nee hatoo husi Prezidente Republika Francisco Guterres Lú Olo, ba jornalista bainhira deklara estadu emerjensia ba dala lima iha Palasiu Prezidente Bairru Pite, Sabadu (05/09/2020).

“Ho laran ksolok mak hau agradese apoiu ba estadu emerjensia, hatoo husi Arcebispu Metropolitanu, D.Virgílio Do Carmo Da Silva, iha 2 Setembru, loron tolu liuba, iha parókia Comoro. Hau fiar katak ho apoiu nafatin husi sosiedade sivíl tomak no ajensia internasional sira, liu husi ida-idak nia esforsu ka nuudar grupu, ekipa sira koordena no lidera husi Ministériu Saúde bele halao sira nia servisu ho diak.” dehan PR Lú Olo.

Xefe estadu dehan hasees-aan husi moras Covid-19 importante tebes ba ema idak-idak hodi bele tau matan ba família, amigu sira, komunidade no povu tomak. “Ita hein katak país sira ho siensia no teknolojia moderna hetan lalais vasina nuudar meiu atu hasae ita-nia defeza no hasees ita hotu-hotu husi moras Covid-19. Enkuantu ita servisu hamutuk ba prevensaun no kombate Covid-19, governu Timor-Leste, nuudar orgaun ezekutivu, buka mos dalan atu oinsá hasae dezenvolvimentu lalais liu, ho benefisíu ba povu tomak.” dehan PR.

Ho planu rekuperasaun kkonomika ba tempu badak, mediu no naruk, PR fiar katak sei lao ba oin organizadu liu, iha prosesu haburas lalais Timor-Leste no lori povu ba moris-diak, maibe atu Timor-Leste buras ba beibeik, ita presiza mos moris saudavel.
Lú Olo dehan atu hadook-an duni husi Covid-19, ida-idak presiza haktuir medida preventiva hanesan uza maskara, fase liman beibeik ho sabaun no hadook-an malu, metru ida ho balu.

Ho kuidadu sira nee mak ema hotu nia servisu loron-loron durante estadu emerjensia ida nee. Instituisaun publika no privada, eskola, loja, merkadu, transporte no fatin publiku neebe deit sei la taka. Toos-nain no traballador neebe deit bele halo servisu baibain. Ho medida preventiva mak bele hasees-aan husi Covid-19.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here