PR: Tamba Covid-19, Prezisa EE Fulan Ida Tan

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika (PR) Francisco Guterres Lú Olo hatete, tamba corona virus nee mak Timor Leste presiza EE fulan ida tan.

Prezidente Republika Francisco Guterres Lú Olo hatoo kestaun nee bainhira deklara Estadu Emerjensia ba dala lima, iha Palasiu Prezidente Bairru Pite, Sabadu (05/09/2020).

“Maun-bin-alin sira iha Timor-Leste no rai-liur povu doben Timor-Leste, Iha 6 Agostu liu ba, hau hatoo mensajen ba povu tomak, katak tanba moras Covid-19, ita presiza moris fulan ida tan ho regras no medidas hatuur ho estadu emerjensia. Horseik, loron 4 Setembru, oras sanulu resin ida, minutu lima nulu resin sia kalan, estadu emerjensia dahaat ramata.” dehan PR Lú Olo.

PR dehan molok estadu emerjensia dahaat ramata, Governu hatoo proposta ba Prezidente Republika iha loron 27 agostu 2020 atu deklara dala ida tan estadu emerjensia ba territoriu nasional tomak durante loron tolu nulu.

Tuir Konstituisaun, haruka Prezidente Republika konsulta kedas Konsellu Estadu no Konsellu Superior Defeza no Seguransa. Hafoin rona Konsellu rua nee, neebe haforsa pedidu governu, Prezidente Repúblika husu autorizasaun ba Parlamentu Nasional iha 1 Setembru 2020.

“Ho autorizasaun husi Parlamentu Nasional no ho kbiit Konstituisaun fo ba Prezidente Republika, hau deklara Estadu Emerjensia ba loron tolu nulu tan, hahu ohin, 5 Setembru, Sabadu, zero oras, no sei ramata iha 4 outubru 2020, Domingu kalan, tuku sanulu resin ida no minutu lima nulu resin sia, iha territoriu tomak.” dehan nia.

Xefe estadu dehan husi anunsiu dahuluk kazu pozitivu iha 21 Marsu 2020 too agora, detekta kazu pozitivu rua nulu resin hitu maibe rua nulu resin neen rekupera ona. Nain ida deit mak sei kontinua hela nafatin iha fatin izolamentu, Klínika Vera Cruz, maibe sei la fo risku ba komunidade tanba kontrola hela. Sulan ema mai husi rai-liur iha kuarentena tenke akompaña mos ho medida preventiva sira seluk.

Tuir rekomendasaun husi Organizasaun Mundial Saude no Ministeriu Saúde medida preventiva importante tebes neebe ema hotu presiza haktuir uza maskara, fase liman beibeik ho sabaun, no hadook-an malu metru ida ho balu.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here