AUTL Rezeita Informasaun Husu Subsidiu

Aliansa Universitariu Timor Leste (AUTL), rezeita informasaun neebe espalla iha publiku kona ba AUTL, husu subsidiu ba Ministeriu Ensinu Superior Siensia no Kultura. (Photo: STL News/Natalina Lopes)

DILI, STLNEWS.co – Aliansa Universitariu Timor Leste (AUTL), rezeita informasaun neebe espalla iha publiku kona ba AUTL, husu subsidiu ba Ministeriu Ensinu Superior Siensia no Kultura.

Kestaun nee reprezentante porta voz AUTL, Moises Soares hatoo hodi responde ba midia balu neebe dehan, AUTL husu subsidiu ba Ministeiru Ensinu Superior Siensia no Kultura.

“Agora dadaun ami koalia kona ba problema propinas nian, maibe iha midia balu fo sai sala katak ami AUTL husu subsidiu nee lalos, ami mos hatene ita nia estadu ida nee laiha kapasidade finanseira para atu fo subsidiu ba estudantes Timoroan tomak iha rai laran,” dehan Moises ba jornalista sira, hafoin submete karta audensia ba iha Sekretariu Jeral Parlamentu Nasional, Segunda (07/09/2020).

Moises mos husu ba Governu liu husi Ministru Ensinu Superior Siensia no Kultura atu bele responsabliza Estudantes Ensinu Superior iha laran nia propinas semester tinan akademiku 2020.

“Laos husu subsidiu hanesan ita nia maluk estudantes iha rai liur fulan-fulan sira simu osan,” nia hatete.

Iha biban nee mos Aliansa Universitariu Timor Leste (AUTL), submete karta audensia ba iha Sekretariu Jeral Parlamentu Nasional (SJPN), bazeia ba audensia anterior neebe halo ba Orezidente Nasional nomos komisaun G, F iha PN.

“Karta audensia neebe ohin ami submete ba iha Sekretariu Jeral Parlamentu Nasional (PN) nian, karta audensia nee bazeia ba iha audensia anterior neebe maka halo ho PPN nomos komisaun G, F iha loron 27 Agostu,” Moises hatutan.

Nia afirma iha audensia anterior PN rekomenda mai sira atu klasifika no identifika estudantes Ensinu Superior iha rai laran, sira neebe laiha kapasidade lori mai aprezenta iha PPN, komisaun G no komisaun F, atu nunee bolu governu ba rezolve.

“Dadus neebe maka PPN rekomenda mai ami nee ida nee seidauk aprezenta atu aprezenta apenas de karta audensia, iha audensia ami foin bele halo aprezenta nomos bele halo klarifikasaun ida neebe detallu,” dehan nia.

Reportajen: Natalina Lopes
Editora: Carme Ximenes

LEAVE A REPLY

Please enter your comment!
Please enter your name here