6 de Setembro de 1999

Dom Carlos Filipe Ximenes Belo (Photo: STL News)

STLNEWS.co – Hahú kedas loron referendu, ema barak halai ba subar iha kompleks Lesidere. To’o domingo loron 5 Setembru kalan, ema sura hamutuk 5000. Loron dadersan ema lubun ne’ená hasoru susar boot.

Dadersan, besik tuku walu (8), nanggala, ho milisi Besi merah putih, haleu uma no hahú tiru, obriga ema hotu sai ba liur. Sira soe bomba molotov hasoru Amu Bispo nia uma, no ahi hahú han janela, odamatan no didin, i neineik sa’e to’o kakulu. Haree ahi han daudaun uam no ahi-suar maka’as, ha’u haruka ema iha uma no kompleks laran sai hotu ba jardin (Largo de Lecidere). Hosi jardin, ami assiste ahi han daudaun uma ne’ebé sai fatin ba Bispo sira hahú tinan 1951…Madre Magarida Soares ho dona Felicidade Monteiro haka’as-aan atu hasai buat balu, maibé la biban salva sasan barak: livru, dokumentu, arkivu, mobiliariu, meza, kadeira, bikan, kanurun,garfu, tudik,kopu, xíkara, etc.etc.

Iha jardin laran, besik Na’i Feto nia monumentu, ofisiál indonesio ida, ho sinizmu, husu ba bispo: “Uskup, bagaimana usaha perdamaian dan rekonsiliasi????”. Hau hatan: “iha susar no funu laran, “usaha” ne’e la’o nafatin, “tetap berjalan, Pak!”. La kleur, jeep ida Kapolwil para besik jardin. Hosi laran ofisiál Polisi ida tun no husu Bispo atu ba kantor Kapolda-Comoro. Entretanto, ami assiste motor barak hosi milisia Merah Putuh to’o Lecidere, atu tula sira nia parente no maluk ne’ebé subar mos iha Kompleks Lesidere. Ema lubun ne’ebe subar iha ne’ebá lori sira nia sasan, buka namakari.. Há’u to’o Kantor Kapolda, Comoro, Kapolda Irjen (Pol) Timbul Silaen husu atu deskansa oitoan; Ikus mai, nia dehan: “Pak Uskup, situasuan la diak ona iha Dili laran; ne’e duni ami husu Uskup hakarak ba Don Bosko (Salezianus) ka Ermera…” Uskup mau ke Ermera?”. Hau hatan, “Lae, bele karik, hau hakarak fila ba Lecidere. “Oh tidak boleh”. La kleur, Madre Margarida mos to’o tuir atu hateten sira lori Bispo ba iha ne’ebé…Hau dehan ba Kapolwil: ” Se labele fila ba Lesidere, entaun ha’u ba Baucau atu koalia ho Uskup Basilio. Tanba ida ne’e, mak besik tuku sanulu resin ida (11), helikópteru ida tula ha’u ba hatun iha Lanu/Baucau. Iha sidade Díli laran, rai nakfilak tiha ba inferno. Loron ne’e hahú ha’u nia kalváriu: hanoin maluk sira ne’ebé ba buka mahon iha Lecidere, ne’ebé, atan ha’u soe hela, hodi halo sira halai nakmakari…Iha Baucau, ha’u hola desizaun: “Ha’u tenki ba Jakarta atu ko’alia ho Nuncio Apostólico,; la bele karik, hau buka dalan atu ba Roma, ko’alia ho Amo Papa João Paulo II”.

Hatutan pajina 2

LEAVE A REPLY

Please enter your comment!
Please enter your name here