Estadu Emerjensia, Feto Nia Moris Sai Vuneravel Liu

Durante iha estadu emerjensia (EE), feto nia moris sai vuneravel liu tan, tanba laiha orsamentu hodi sustenta familia. (Photo: STL News/Emerenciana Pinto)

DILI, STLNEWS.co – Durante iha estadu emerjensia (EE), feto nia moris sai vuneravel liu tan, tanba laiha orsamentu hodi sustenta familia.

Tuir Diretora Redi Feto Aida Exposto, katak tuir sira nia haree seidauk tama estadu emerjensia familia barak moris vuneravel ona, satan tama tan estadu emerjensia halo feto sira sai vuneravel aat liu tan.

“Tama tan ho Covid-19, nunee mos estadu emerjensia entaun sira nia moris sai vuneravel liu tan ona, tanba feto barak mos lakon sira nia serbisu iha restorante sira, loza, nunee mos sasan la folin, sira lahetan orsamento, entaun sira hasoru situasaun ida nee sai hanesan funu boot ida, tanba ita lahatene moras nee too bainhira mak bele hotu no ita lahatene inserteza boot, no lahetene moras nee husi se, entaun husi nee halo sira tauk no trauma, fo mos impaktu ba iha uma laran” dehan Diretora Redi Feto Aida Exposto, ba STL iha nia knaar Fatin, Caicoli, Kinta (10/09/2020).

Diretora Ezekutiva nee dehan durante estadu emerjensia nee fo impaktu neebe mak boot tebes ba feto sira, oinsa mak buka osan hodi sustenta aan no familia, tanba estadu emerjensia fo mos limita ba ema.

Diretora Redi Feto Aida Exposto. (Photo: STL News/Emerenciana Pinto)

“Nee fo mos impaktu boot tebes, tanba estadu emerjensia ema barak lahatene didiak regulamentu oinsa mak halao estadu emerjensia nee rasik, entaun ita neebe mak iha formasaun hatene katak estadu emerjensia nee limite iha parte balun deit, maibe sira neebe mak la asesu informasaun nee hanoin estadu emerjensia lasai los kedas” katak nia.

Diretora nee hatutan laos fo impkatu iha estadu emerjensia deit, maibe feto nebee mak iha area rural mos sempre hasoru problema oin oin, dala ruma sira iha produtu atu ba faan iha merkadu sira maibe laiha transporte, entaun ida nee mos sai difikuldade boot ba feto no komunidade neebe mak hela iha area remotas sira.

“Dala barak mos sira sente moras atu ba hospital maibe laiha trasporte atu tula sira ba hospital, ida nee mos sai difikuldade neebe mak boot tebes ba feto no komunidade neebe mak iha area rural hasoru, nunee mos bainhira feto sira hasoru violensia domestika sente ofende maibe laiha transporte atu tula sira ba hatoo keixa, ida nee mos sai impaktu boot tebes” dehan nia.

Nia hatutan liu husi observasaun Redi Feto, peskiza neebe mak halao haree katak antes nee ema barak vuneravel tiha ona, depois aumenta tan estadu emerjensia entaun ema aumenta vuneravel liu tan.

Reportajen: Emerenciana Pinto

Editor: Ekipa STL

LEAVE A REPLY

Please enter your comment!
Please enter your name here