9-10 Setembru 1999 iha EUROPA

Dom Carlos Filipe Ximenes Belo (Photo: STL News)

STLNEWS.co – Husik tiha Darwin, ha’u liu ba Europa no halo eskala iha Singapura no Londres. Iha ne’e ema jornalista portugés Mario Robalo, hein tiha ona, hodi akompaña ba Lisboa.

Iha loron 10, fulan setembru, h’au to’o aeroporto Lisboa nian. Ha’u la hein katak, ema malae sira hein atan há’u no prepara resepsaun boot ida. Malae portugés, ema timor oan, jornalista hosi Radio no TV. Wainhira sira rona katak há’u sai hosi Darwin ba dadaun Portugal, Rádio Renascença halo kapaña husu sidadaun lisboeta atu hein iha liuron wainhira karreta ne’ebé sei tula h’au liu hosi avenida sira iha Kota Lisboa laran. Sira husu ema iha Lisboa, atu simu “Bispo” Dili nia, hodi hatudu sira nia solidariedade ba Povu Timor Loro Sa’e!!! Iha liuron ka avenida nini mesa ema deit…

Ha’u to’o iha aeroportu, wainhira tun hosi aviaun no tama sala VIP ha’u hakfodak haree Autoridades civis no religiosas hein hela iha ne’ebá: Sr. Presidente da República, Dr. Jorge Sampaio; Senhor Primeiro-Ministro, Dr. António Guterres, Senhor Presidente da Assembleia da República (Parlamento) Dr. Almeida dos Santos, Sr. Patriarca de Lisboa, Dom José Policarpo, padre Provincial salesianos sira nian, Pe. Joaquim Mendes, no autoridades seluk tan. Atan ha’u kumprimenta no agradese tiha, hau sai ba liur, no hanoin atu ba ho Padre Provincial, ba Casa Dom Bosco (uma provinsial salesianos sira nian). Maibé, ema (protocolo) haruka hau sa’e karreta ida, ne’ebé, prepara tiha ona (carro aberto), hodi halai iha sidade Lisboa laran to’o Casa Dom Bosco, iha Rua Saraviva de Carvalho, 275. Iha liuron ninin, ema rihun ba rihan basa liman, soe ai funan ba karreta laran.

To’o iha Casa Dom Bosco, ami liu ba Igreja de Nossa Senhora Auxiliadora atu reza hodi agradese ba grasa hotu hotu, liu liu ba viajen naruk ne’ebá. Kalan, há’u ba Palácio iha Belém, hodi kumprimenta no agradese Senhor Presidente da República Portugal nian, Dr. Jorge Sampaio. Depois, ami janta hamutuk. Hau nia lifuan mak: Muito Obrigado, Portugal!!!

Maibé, iha Timor laran, maluk sira halai namkari, balu kanek, balu mate, no sasan sira ema baku no sobu rahun sunu mos.. Iha tempu ne’ebá Timor hanesan infernu boot ida. Bapak (tentara oknum) ho milisia timor oan sira kontenti tebe rai…sira hanoin manan ona, hodi sobu Timor Lor Sa’e. Ida ne’e hanesan vingança ida, tanba timor oan sira la simu “opsi otonomi”.

Loron hirak tuir mai, atan há’u liu ba Italia atu hasoru Amo Papa, Sua Santidade, João Paulo II.


Lisboa, 8 de setembro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here