PR – Governu Diskute Kontrola Fronteira

Prezidente Republika konvida governu da-8 neebe lidera husi Primeiru Ministru Taur Matan Ruak, tuur hamutuk hodi diskute oinsa kontrola ema tama sai iha fronteira. (Photo: Media PR)

DILI, STLNEWS.co – Prezidente Republika konvida governu da-8 neebe lidera husi Primeiru Ministru Taur Matan Ruak, tuur hamutuk hodi diskute oinsa kontrola ema tama sai iha fronteira.

Kestaun nee hatoo husi Xefe Kasa Sivil, Francisco Maria de Vasconcelos ba Jornalista, iha Palasiu Prezidente Nicolau Lobato, Bairru-Pite, Dili, Kinta (10/09/2020).
Nia dehan, Prezidente Republika hamutuk Premeiru Ministru, Ministru Defeza, Vise Primeiru Ministru ho Ministru Negosiu Estranjeiru, halao enkontru hodi diskute kona ba Fronteira.

“Prezidente Repubika ho Governu diskute oinsa koalia konaba ema tama sai ilegal nee, atu nunee labele lori impaktu ba transmisaun COVID-19 iha ita nia sosiedade, tanba ita hatene ema sira neebe tama husi dalan ilegal nee dala ruma lori moras iha sira nia isin, tanba,” hatete Xefe Kasa Sivil Francisco .

Xefe Kasa Sivil nee hatutan, pontus neebe inportante governu presiza tau matan nunee bele asegura fronteira. Ema neebe tama sai husi dalan ilegal, buka tuir hatama iha kuarentena, para bele labele iha transmisaun lokal iha komunidade.

Maibe governu sei lori fila asuntu ida nee ba diskute iha Konsellu Ministru, atu nunee bele foti asaun hodi kontrola sidadaun neebe tama sai iha area fronteira. Iha enkontru nee la koalia assuntu seluk, maibe fokus liu ba iha seguransa fronteira iha aeroportu sira neebe ema kontinua tama sai ba mai.

“Governu sei hola medidas tuir buat neebe mak Prezidente dekreta ona Estadu Emerjensia, atu nunee ita bele impoin regras ba ita nia sidadaun rasik, se ita tolera ida ka rua bele lori impaktu boot ba ita nia sosiedade liu liu sira neebeiha fronteira neeba,” dehan nia.*


Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here