KSTL-Traballador Luta Hasoru Kompania Guardamor

Konfederasaun Sindikatu Timor Leste (KSTL), hamutuk ho traballador kontinua luta hasoru kompania Guardamor, hodi hetan solusaun ba problema neebe akontese. Lia hirak nee hatoo husi Prezidente KSTL, Almerio Vila Nova ba jornalista sira, iha fatin Guardamor Fatuhada, Segunda (21/09/2020). (Dok: STL)

DILI, STLNEWS.co – Konfederasaun Sindikatu Timor Leste (KSTL), hamutuk ho traballador kontinua luta hasoru kompania Guardamor, hodi hetan solusaun ba problema neebe akontese.

Lia hirak nee hatoo husi Prezidente KSTL, Almerio Vila Nova ba jornalista sira, iha fatin Guardamor Fatuhada, Segunda (21/09/2020).

“Sindikatu Timor Leste firme nafatin hamutuk ho traballador sira hodi kontinua luta hasoru kompania Guardamor too hetan solusaun, tanba hahalok violasaun no inspirasaun ba direitu traballador nian labele ejiste iha ita nia nasaun ida nee,” dehan Almerio.

Nia hatete ema hotu terus ba ukun rasik aan atu goja liberdade no goja moris nee, maibe ema ruma lakonsidera direitu fundamental neebe hakerek iha lei traballador, ida nee sidikatu sei la tolera no la nonok atu hasoru emprezariu neebe hatudu atetude hanesan nee.

“Asaun greve nee ami sei halo kontinua nafatin, se bainhira seidauk hetan solusaun ba problema ida nee, ami sei halo kontinua greve too empregador iha inisiativa diak, atu rezolve problema traballador sira nian,” nia esplika.

Traballador sira tuir Almerio katak, servisu iha tinan 5 too tinan 11, maibe depois husik deit traballador sira hanesan nee. Iha SEFOPE mediasaun dala rua dala rua, maibe kompania nunka halo tuir lei nee.

“So Guardamor kompania neebe maka nunka, atu fo tratamentu ba diak ba ninia traballador sira durante nee, tanba nee maka ami apelu ba iha governu mos ba iha instituisaun sira hotu neebe fo tenderizasaun ba Guardamor nee tenke tetu halo didiak,” Almerio afirma.

Iha fatin hanesan Diretor Guardamor, Eduardu Belo hatete, kona ba violasaun ou kontra lei kalae nee so SEFOPE maka bele koalia, laos mai hakilar hanesan nee.

“Ita boot sira mai bele hakilar vontade ho vontade laiha problema ida, maibe koalia kona ba lei, sira husi sindikatu mos laos iha kompetensia atu koalia, problema entre ita boot sira ho ami, se problema entre ita boot sira traballador ho ami presiza ema ida iha laran atu rezolve, neebe laos ita boot sira mesak atu rezolve no ami mesak atu rezolve, presiza ema ida iha klaran atu rezolve,” nia dehan.*

Reportajen: Natalia Lopes
Editora: Carme Ximenes

LEAVE A REPLY

Please enter your comment!
Please enter your name here