Media Balu Seidauk Hetan 60%

Husi fundu Covid-19, governu apoiu 60% ba traballadores neebe servisu iha empreza privadu, inklui media sira. Maibe too agora media balu seidauk hetan subsidiu. (Foto: Espesial)

DILI, STLNEWS.co – Durante implementa Estadu Emerjensia (EE) hodi kontra Covid-19, kompania sira koa salariu traballadores. Maibe governu lataka matan. Husi fundu Covid-19, governu apoiu 60% ba traballadores neebe servisu iha empreza privadu, inklui media sira. Maibe too agora media balu seidauk hetan subsidiu nee, inklui Suara Timor Lorosae (STL).

Kestaun nee hatoo husi membru Bankada Fretilin Marito Mota iha sesaun plenaria Parlamentu Nasional (PN), Segunda (21/9/2020). “Konaba 60% nee, media seluk hetan, tanba sa mak media STL seidauk hetan, razaun saida. Governu presiza esplika,” hatete Mario Mota.

Hatan kestaun nee Ministru Asuntu Parlamentar no Komunikasaun Sosial (MAPKOMS) Francisco Jeronimo hatete, nia parte fo esplikasaun dala barak ina iha PN, nomos ba media sira katak, empreza hotu iha obrigasaun atu rejista iha Institutu Nasional Seguransa Sosial (INSS), para hetan direitu 60% nee.

“Sei lahetan, entaun ita mos halo pergunta fali, serah que rejista ka lae iha INSS. Iha INSS dadus kompletu. I ami labele dehan, kompania neebe larejista iha INSS mos tenke hetan,” hatete Jeronimo.

Karik seidauk rejista, tenke ba rejista lai. Ninia prosesu nee, tenke rejistu no halo kontribuisaun obrigasaun uluk ba iha INSS. Depois mak bele hetan direitu ida nee. “Prosesu mak tenke halo rejistu ba seguransa sosial, sei rejista ona iha seguransa sosial no halo ona kontribuisaun iha 40% husi traballadores ka jornalista sira, no 60% husi instituisaun refere hau hanoin lista dadus kompletu hela nee laiha problema,” hatete Jeronimo.

Rona tiha esplikasaun nee, Mario Mota hatete, tuir informasaun jornalista sira husi STL katak, sira kontribui ona ba seguransa sosial kuaze tinan 2 ona. Maibe too agora sira lahetan subsidiu nee.

Reportajen: Guilhermina Franco/Domingas Soares

Editor: Gaudensiu M

LEAVE A REPLY

Please enter your comment!
Please enter your name here