SEPS Koopera Ho Ajensia Internasional

Sekretariu Estadu Protesaun Sivil (SEPS) iha planu halo kooperasaun ho ajensia internasional, hodi haree ba ekipamentus material ka infraestrurura sira neebe SEPS presiza. (Foto: STL/Efizenia da Costa)

DILI, STLNEWS.co – Sekretariu Estadu Protesaun Sivil (SEPS) iha planu halo kooperasaun ho ajensia internasional, hodi haree ba ekipamentus material ka infraestrurura sira neebe SEPS presiza.

Kestaun nee hatoo husi Sekretariu Estadu Protesaun Sivil, (SEPS), Joaquim Gusmão ba jornalista sira, iha JL-Villa Fatuhada, Dili, Tersa (22/09/2020).

Nia esplika, objetivu husi enkontru ida nee, primeiru fo apresiasaun no obrigada ba sira, tanba durante nee sira ajuda tebes SEPS liu hasoru dezastre naturais sira neebe mak akontese iha rai laran.

“Kooperasaun internasional nee importante tanba servisu SEPS nian, operasional neebe liga ba iha instituisaun seluk hotu hotu, nomos liga ba nasaun sira liuliu nasaun vizinu hanesan Indonezia, Autralia,” dehan Joaquim.

Nia hatutan agora dadaun SEPS prepara hela ona planu kooperasaun internasional nian, ho prioridades ba SEPS mak institusional nian, liuliu ba iha legalidade no rekurusus humanus inklui ekipamentu ka infraestrutura sira neebe mak presiza ba iha SEPS.

Joaquim esplika reuniaun nee hatoo mos planu koperasaun ba iha parseiru sira, nunee sira bele hatene saida mak sai hanesan programa prioridade SEPS nian no saida mak sira bele halo, karik sira komesa halao planu ba buat neebe mak presiza atu apoiu ba protesaun sivil.

“Parseiru sira apoiu buat barak ba ita, liuliu barak mak apoiu konaba treinamentu nian, hanesan bombeirus iha Thailandia, Malazia, Indonezia, nomos apoiu liuliu ba iha emerjensia nian iha ita nia dezastre naturais, apoiu hahan materias konstrusaun mai husi parseiru internasional sira,’ dehan nia.*

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here