Hadia Sistema PSHT Sae Sintu

Embaixador Indonezia mai Timor-Leste, Sahat Sitoru. (Foto: STL/Efizenia da Costa)

DILI, STLNEWS.co – Embaixador Indonezia mai Timor-Leste, Sahat Sitorus hatete, nia parte sei koalia ho governu Indonezia hodi haree kona ba sistema sae sintu ba organizasaun Persaudaraan Setia Hati Terate (PSHT).

Kestaun nee Sahat hatoo relasiona ho informasaun kona ba organizasaun Persaudaraan Setia Hati Terate (PSHT) ba sae sintu iha Indonezia viral tebes, hodi halo governu Timor-Leste preokupa, nunee mos nasaun vizinu Indonezia, liu husi ninia embaixador iha Timor-Leste.

Embaixador nee rekonese katak sidadaun Timor-Leste, liu-liu joven sira kontinua tama ilegal ho numeru neebe mak labele konta liu husi fronteira Bobonaro, Oecuse no, mos Covalima.

“Fronteira TL ho Indonezia Oecusse, Maliana, Balibo, no Suai nee ema neebe tama ilegal, ninian numeru makas tebes, no ema sira nee tama ilegal kalan boot, hau haree barak liu mak membru organizasaun arte marisias,” dehan nia hafoin partisipa sorumutu ho Sekretariu Estadu Protesaun Sivil (SEPS), iha Otel JL-Villa, Fatuhada Dili, Tersa (22/09/2020).

Nia esplika governu Timor Leste preokupa tebes kona ba kestaun nee, liu-liu Preizidente Republika, no Primeiru Ministru, Jeneral Lere, inklui Ministru Desportu nian.

“Mai ita halo komunikasaun, no hau hein. Presidente Republika, no Primeiru Ministru mos hatoo ona, nunee ita bele hatoo ba Indonezia katak dadaun nee grupu arte marsias sira nee tenke organizadu, halo regulamentu neebe labele kontradis ho kooperasaun nasaun rua,” nia komenta.

Nia mos la konkorda katak, grupu arte marsiais Persaudaran Setia Hati Terate (PSHT), ba sae sintu iha Indonezia tenke rei Bandeira Indonezia tanba tuir nian ida nee viola konstituisaun neebe mak nasaun nee iha.

Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here