Governu Propoin PR Dekreta EE da-6

Ministru Prezidensia Konsellu Ministrus (MPKM), Fidelis Leite Magalhães. (Foto: MPKM)

DILI, STLNEWS.co – Governu liu husi enkontru Konsellu Ministru deside propoin ba Prezidente Republika, atu dekreta tan Estadu Emerjensia ba dala 6.

Ministru Prezidensia Konsellu Ministrus (MPKM), Fidelis Leite Magalhães hatete, governu liu husi enkontru Konsellu Ministru deside solisita ba Prezidente Republika Francisco Guterres Lú Olo, atu deklara tan Estadu Emerjensia ba dala 6.

“Governu halo deliberasaun ida neebe propoin ba Prezidente Republika, atu halo estensaun ba Estadu Emerjensia ba dala 6,” dehan MPKM Fidelis ba jornalista sira, iha Palasiu Governu, Dili, Kuarta (23/09/2020).

Fidelis esplika atu evita no netraliza risku sira husi propagasaun SARS-Cov-2 (COVID-19), nunee bele proteje saude publika no kapasidade atu resposta ba sistema saude nasional, karik wainhira mosu tan kazu foun ruma.

Maski nunee nia dehan, governu iha ajenda neebe nakonu relasiona ho debata Orsamentu Jeral Estadu (OJE) 2020 no 2021, tanba nee Konsellu Ministru deside prepara karta ida husi Primeiru Ministru, atu husu Prezidente Republika hodi fo tempu.

Nunee iha semana oin wainhira Prezidente Republika iha tempu bele konvoka enkontru, hodi rona entidade Konsellu Estadu no Konsellu Seguransa, depois lori ba iha Parlamentu Nasional no lori fali ba Prezidente Republika atu dekreta.

“Konsellu Ministru desde ohin atu fo biban ba Prezidente Republika, nomos ba iha Parlamentu Nasional para bele organiza ajendamentu hodi evita ajenda neebe soke malu,” nia esplika.

Nia dehan estensaun Estadu Emerjensia nee, sei suspende ka restrinje direitu tomak kona ba sirkulasaun Internasional, sirkulasaun no fiksasaun rezidensia no resistensia.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here