Governu Presiza Reativa Merkaduria

Development Manager World Vision, Jose Manuel Mendes. (Foto: Blandina Mauno)

DILI, STLNEWS co – World Vision husu atu governu reativa merkaduria ba iha nivel munisipiu, suku too aldeia, atu nunee bele ajuda rekopera ekonomia iha rai laran.

Development Manager World Vision, Jose Manuel Mendes hatete, World Vision implementa projetu neebe maka liga ho agrikultur no ekonomia, hodi bele dezenvolve ekonomia povu nian.

“Ida nee ami envolve ona governante sira atu sai hanesan observador karik implementa iha munisipiu seluk, tanba bainhira koalia kona ba ekonomia ita barak liu mak konsentra iha Dili”, hatete Jose ba STL, iha Salaun World Vision, Bidau Mota klaran, Kinta, 24/09/2020.

Nia hatutan, ekonomia iha munisipiu, iha suku too aldeia persiza atu governu tau atensaun ho diak, para sira bele iha merkadu neebe maka bele garantia atu bele faan sira nia produtu.

“Liu-liu grupu neebe forma ona labele forma deit iha baze, maibe tenke lori sira ba merkaduria”, nia hatete. Jose afirma oras nee dadauk planu neebe maka governu halo diak ona, maibe presiza tebes husi parte hanesan Igreja, ONG no Sosiedade Sivil sira, bele servisu hamutuk atu liga liu ba merkaduria.

Presiza dezenvolve diak liutan merkadu neebe uluk governu harii iha fatin-fatin, atu oinsa mak halo reativa fila fali, para grupu agrikultur sira nia produtu bele hatama iha nivel komunitariu no iha loja, ho nunee sira bele hakbesik an hodi faan too nivel nasional.

“Tanba uluk governu dehan povu kuda governu sosa, programa nee diak tebes, atu nunee oinsa reativa fali ho forsa atu programa ida nee lao diak tebes”, nia esplika.

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here