Issu Rezigna An, Taur: Keta Fiar

Primeiru Ministru (PM) Taur Matan Ruak. (Foto: Gabinete PM)

DILI, STLNEWS.co – Primeiru Ministru Taur Matan Ruak hatete, keta fiar ho issu rezigna an neebe espalla iha publiku, tanba nia sei la rezigna an husi kargu Xefe Governu, iha governu da-8.

Kestaun nee Xefe Governu hatoo, hodi responde ba issu neebe espalla iha publiku katak, iha tempu badak Primeiru Ministru, Taur Matan Ruak sei rezigna an husi nia kargu no la ba reprezenta Governu iha Parlamentu Nasional, iha diskusaun OJE 2020 no 2021.

“Nee mehi karik tanba agora hau rasik serbisu makaas ona no rezigna aan tempu laiha ona neebe keta fiar. Sira neebe mak dehan hau rezigna aan aan keta hamlaha karik,” dehan PM ba jornalista, bainhira remata hasoru malu ho PR, iha palasiu Prezidente Nicolau Lobato, Bairru Pite, Dili, Kinta (24/09/2020).

Aleinde nee iha enkontru ho Prezidente Republika nee mos Primeiru Ministru Taur Matan Ruak relata assuntu tolu ba Xefe Estadu hanesan Orsamentu Jeral Estadu 2020, seguransa fronteira no pasajen ilegal sira.

Tanba tuir Xefe Governu katak, lao Ilegal nee sai preokupasaun ba estadu no governu, nunee informa ba Prezidente Republika hodi buka pasu oinsa atu bele rezolve.

“Ita presiza kooperasaun Indonezia, tanba ita nia sira ba ilegal sira simu naturalmente ita buka dalan koopera nunee sensibliza ita nia sidadaun sira para hatene katak, ita iha regra ida nee laos ba governu deit, maibe ba sidadaun sira satan moras COVID-19 lao,” hatete PM Taur.

Eis aman nasaun atual Primeiru Ministru iha governu da-8 nee afirma, sidadaun neebe lao ilegal ba nasaun neebe afetadu ba COVID-19, bainhira fila mai Timor Leste balun subar, entau lori moras COVID-19 bele daet ba familia neebe iha uma laran.

“Sira neebe mak balun ba tiha fila fali mai subar deit, entaun lori moras daet feen oan ka inan aman ka familia sira iha uma laran, kasihan maibe nu fim fo sala ba estadu, kontrariu sira rasik mak falta responsablidade, tanba nee mak sensiblizaun nee tenke iha,” Xefe Governu esplika.

Eis jeneral fitun rua nee mos husu ajente seguransa forsa makaas liu tan hodi halo seguransa iha fronteira, hodi haree sidadaun neebe lao ba mai ilegal hela deit.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here