Governu La Prepara Kondisaun Ba Bolseiru

Reitor UNPAZ, Adolmando Soares Amaral. (Foto: STL/Blandina Mauno)

DILI, STLNEWS.co – Governu liu husi Ministeriu Ensinu Superior Siensia no Kultura (MESSK), fo oportunidade ba Timoroan asesu ba bolsu estudu, maibe laprepara kondisaun ba sira.

Reitor UNPAZ, Adolmando Soares Amaral hatete, governu liu husi Orsamentu Jeral Estadu, atu investe ba rekursu humanu, depois governu fo oportunidade ba Timoroan balun asesu ba bolsu estudu atu ba aplika iha nasaun sira seluk.

“Hau observa iha tempu ba Timoroan sira ba halao estudu iha universidade rai liur, governu tenke halo ona kampu traballu, tanba haruka ona ema ba, saida mak prepara, depois sira fila mai aproveita esprensia neebe sira hetan durante ba aprende iha rai liur,” hatete Adolmando ba STL, iha knaar fatin Kampus UNPAZ, Sesta (25/09/2020).

Governu tuir nia katak, hatene deit haruka ema Timoroan ba halao estudu iha rai liur, maibe lahalo kampu traballu iha rai laran, ka laprepara kondisaun no lahatene aproveita rekursu humanu neebe haruka.

Nia hatutan governu iha hanoin diak, tanba fo oportunidade ba Timoroan sira bele asesu ba bolsu estudu no sira, bele sai rekursu humanu ka esprensia barak ona.

Maibe kondisaun saida mak prepara iha laran, wainhira sira fila tenke aproveita atu servisu iha rai laran, duke sira fila mai sai dezempregu.

“Ami hanoin ba oin governu haruka nafatin, maibe haruka ho area, neebe presiza ka area neebe rekursu humanu menus,” nia esplika.

Iha parte seluk antes Ministru Ensinu Superior Siensia no Kultura (MESSK) Longuinhos dos Santos hatete, governu halo ona planu atu investe tan osan hodi fo estajiu profisional ba estudante bolseiru sira, maibe lasignifika fo ona servisu.

“Estajiu profisional ba estudante bolseiru sira, lasignifika katak hetan ona servisu, nee hanesan forma sira atu bele adopta sira nia kuinesimentu ka esprensia ba sira,” hatete Longuinhos.

MESSK iha planu atu halo forum empreza hodi akumula empreza publiku no privada sira, atu bele haree situasaun ida nee, oportunidade internasional nunee bele lori fundu husi konvensoes atu diresaun sira neebe iha Sekretariu Estadu ambiente bele halao nia knaar ho diak.*

Reportajen: Blandina Mauno
Editora: Carme Ximenes

LEAVE A REPLY

Please enter your comment!
Please enter your name here