SÃO VICENTE DE PAULO (27 de setembro)

Dom Carlos Filipe Ximenes Belo (Photo: STL News)

STLNEWS.co – Saun Vicente de Paulo moris iha loron 24 fulan abril tinan 1581 iha Pouy, Gasconha, França. Maske nia labarik ida ke intelijenti, to’o otas 15, nia serbisu iha to’os, no hein fahi no bibi, atu bele tulun nia família ne’ebé kiak. Iha tinan 1595, nia husik nia knua atu ba eskola iha koléjiu fransiskanu iha Dax. Atu selu oan nia viajen, inan no aman tenki fa’an tiha sasan balu atu hetan osan. No se mak selu Vicente nia eskola? Ema advogadu ida, ne’ébe haree katak foin sa’e ne’ebá ulun mamar atu halo estudu, no tama seminário. Wainhira eskola hotu tiha, no hetan rezultadu diak, Vicente fila ba advogadu ne’e uma atu hanorin labarik sira.

Halo tiha estudu iha Seminário iha Saragoça, Vicente de Paulo simu tonsura no orden menor sira iha loron 20 dezembru 1596, Ho nia benfeitor nia tulun Vicente halo matríkula iha Universidade Toulouse atu estuda Telojia. Nia simu ordenasaun saserdotal ho otas 19. Loron ida, nia halo dadaun viajen ba Marselha; iha dalan, ema kaer nia no lori no ba fa’an hanesan dadu rka eskravu(atan) iha Tunes (África). Iha tempu dadur ka moris hanesan atan, nia troka na’in dala haat, dehan katak señor na’in haat mak sosa nia. Tempu dadur hotu tiha, Vicente de Paulo fila ba Paris; iha ne’ebá, Vicente de Paulo moris iha silénsiu no orasaun laran; niamos hala’o esperiénsia pratika karidade, hamutuk ho “Irmãos de São João de Deus”.

Tan ba nia moris kiak los, nia belun no maluk sira, hameno ba lirai-feto Margarida atu bele simu amu-lulik Vicente de Paulo hanesan konselleiru no kapelaun. Neineik, nia hetan osan to’o 1.200 libras. Ninia diretor espirtual padre Berule dehan ba nia katak ninia moris “desorientado”. Entaun husu nia atu halo retiro espiritual iha loron tolu nolu laran, tuir modelu Santo Inácio de Loiola nian. Liu tiha ida ne’e, amu-luli, Vicente husik knaar kapelaun, no ba hela iha knua ida besik sidade Paris. Iha tempu ne’e, mak nia hahú serbisu ba ema kiak sira. Nia hasoru ema ne’ebé agrikultór, ema badaen sira, ema kiak no ema “desempregado”. Nia esperimenta oin sa ema kiak sira terus… Atu hala’o apostoladu ho ema kiak sira, nia halibur amu-lulik balu, atu hamutuk serbi ema kiak no beik ba doutrina. Nune’e amu-lulik Vicente de Paulo Congregação da Missão, ne’ebé nia objetivu kuida ema kiak no sira ne’ebé hakarak sai amu-lulik. Congregação ne’eba moris iha tinan 1626, iha “Colégio dos Bons Meninos, Paris”. Sira mos hetan ema benfeitor. Ema boot sira hosi Gondi sai benfeitor no saran osan hamutuk: 45.000 libras ba Congregação. Iha tinan 1632, Vicente de Paulo muda ba “priorado S. Lázaro”, ne’ebé sai hanesan Sentru importante ka “Casa Mãe”. Iha ne’e Vicente de Paulo fó formasaun ba naa’i-lulik sira no seminaristassira. Tuir mos koneferénsia ne’e ema dato(nobres) no riku sira. Nia mos serbisu hanesan pároku iha Chantillon. Loron ida, mosu señora ida husu nia atu fo hanoin ba ema feto sira atu tulun uma-kain dia ne’ebé kiak. Ema barak hatán, nune’e, neineik mosu organzasaun ho finalidade tulun ema kiak sira. Padre Vicente de Paulo husu ba ema feto sira, atu loron-loron ba vizita no tulun ema kiak ka moras iha sira nia uma. Ikus mai, ho inisiativa ne’e, mak mosu konfraria karidade nian. Iha señora sira let mosu mos Luisa de Marillac, ne’ebé hamutuk ho Saun Vicente de Paulo haríi Congregação da Irmãs da Caridade.

Saun Vicente de Paulo mate ho otan 80, iha loron 27 fulan Setembru, tinan1660. Iha Liturjia, Uma-kreda harohan hodi hanoin hikas virtude apostóliku Saun Vicente de Paulo nian, hodi serbisu ba ema kiak sira.

Lisboa, 26 de setembro de 2020
Dom Carlos Filipe Ximenes Belo

LEAVE A REPLY

Please enter your comment!
Please enter your name here