KPMD Detein Ema Nain Sanulu

Adjuntu Komandante KPMD, Superintedente Xefe Euclides Belo. (Foto: STL/Efizenia da Costa)

DILI, STLNEWS.co – Iha semana ida laran Komandu Polísia Munisípiu Dili (KPMD), detein ema nain sanulu (10), tanba komete iha krime balun.

Adjuntu Komandante KPMD, Superintendente Euclides Belo hatete, sidadaun hirak nee Polísia detein, tanba balun komete iha kazu jogu ilisitu, balun viola lei kodiku estrada tanba laiha karta kondusaun no seluk komete iha krime ofensa integridade fízika simples (OIFS).

“Suspeitu neebe mak Komandu Munisípiu Dili detein nee hamutuk nain sanulu (10), ba tipu kazu sira neebe mak ohin hau temi nee, “dehan Euclides bainhira hasoru malu ho jornalista sira, iha knaar fatin, Caicoli-Dili (28/09/2020).

Husi numeru nee nia dehan, desizaun husi Tribunal aplika medida kosaun ba sidadaun nain rua hodi selu multa $105 no nain ida aplika ba aprejentasaun períodika, nain tolu (3) Komandu Munisípu Dili liberta, libre husi Tribunal nain ida, enkuantu liberta laiha medida kosaun ruma hosi Tribunal nain tolu.

“Portantu semana ida nee suspeitu sanulu mak ita detein no medida sira, neebe mak foti nee servisu kordenasaun ho Ministeriu Publika,” dehan nia.

Nia hatete, atu halo prevensaun ba krime sira nee mak komandu, ativa hotu seksaun hotu para halo patroliamentu lao ain, patroliamentu motor no kareta.

“Knaar neebe mak atribui ba PNTL nee ami utiliza hotu, ho meius komunikasaun neebe ami utilize nee para bele halo komunikasaun, tanba nee mak komandu PNTL munisípiu Dili halo patroliamentu rutina, kalan no loron,” esplika Euclides.*
Reportajen: Efizenia da Costa
Editora: Carme Ximenes

LEAVE A REPLY

Please enter your comment!
Please enter your name here