Familia Tenki Lembra Bebeik Juramentu Neebe Halao Ona

Padre Kampianus Tagul. (Foto: STL/Emerenciana Pinto)

DILI, STLNEWS.co – Tuir Padre Kampianus Tagul, katak familia neebe mak halo ona juramentu tenki lembra bebeik nunee bele hametin nafatin familia.

Kestaun nee hatoo husi Padre Kampianus Tagul ba STL via telefone Kinta (01/10/2020), hatete ema barak preokupa ho problema sira neebe mosu iha Timor Leste relasiona ho moris familia nian hanesan namora malu neebe la kontroladu, aksaun soe bebe, tara-an/oho-an, barlakeadu-barlakeada, divorsiu, hola feto rua, violensia domestika, violasaun seksual, tanba nee mak husu familia sira diak liu lembra no lao tuir nafatin juramentu neebe mak halo ona.

Padre hatutan liu husi media STL, hatoo mensajen ba familia sira liliu ba família Kristaun sira. Dahuluk, familia sira esforsu-an atu halo tuir Maromak nia hakarak. Maromak hakarak atu ema hatene hadomi Maromak no ema seluk, hatene respeitu dignidade humana no respeitu moris, perdua ba malu, halo sakrifisiu ba malu no seluk tan.

Padre mos dehan, ema neebe hatene hadomi, hatene respeitu dignidade no ema seluk nia moris sei la halo abortu, sei la soe bebe no sei la estraga nia vida rasik (tara-an, oho-an) no ema nia vida.

“Família Katolika sira tenki lembra beibeik juramentu neebe halo tiha ona. Hau jura hadomi o, respeita o nafatin iha tempu diak no tempu aat nia laran too mate hau la soe too mate familia sira presiza aprende nafatin husi família nazare neebe ho vontade tomak halo tuir Maromak nia hakarak, sira hari fundasaun família neebe metin. Buat hirak nee so bele halo ho tulun Maromak nian, tamba nee familia sira hametin nafatin relasaun ho Maromak liu husi orasaun, reza tersu no eukaristia santa” dehan Padre Kampianus.

Padre hatutan familia sira tenki berani hasoru problema sira no esforsu-an atu buka solusaun ba problema sira. Familia sira sempre hasoru problema oioin. Família sira la bele sees-an husi problema sira maibe esforsu-an atu rezolve hodi hetan solusaun ba problema sira.

Família sira mos labele ansi atu foti desizaun ruma maibe tenki tetu didiak molok desidi buat ruma. Ida nee importante para familia sira la bele foti desizaun neebe sala hodi hanoin katak hakotu vida (oho-an/tara-an, hemu aimoruk aat no soe bebe) bele sai solusaun ba problema sira. Ida nee desizaun neebe sala no kontra Maromak nia ukunfuan, solusaun neebe hetan tenki fo garantia ema barak nia diak (família no komunidade), laos deit ba laen, laos deit ba feen.

“Ida nee mak hau moris, hau nia vokasaun no hau nia mensajen ba joven-estudante sira no família sira. Hau habelar buat neebe hau iha, buat neebe hau halo, buat neebe hau hetan, ba ita boot sira hotu. Hau espera katak ita boot sira bele aprende netik buat diak ruma husi hau nia moris maske buat neebe simples.” dehan Padre.

Iha biban nee Padre nee mos hatoo lia menon ba joven no estudante sira hotu katak joven mak sai fator determinante moris diak, tanba nee mak tenke esforsu aan hodi aprende no estuda iha kapasidade atu uza rekursu humanu no rekursu natural neebe iha.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here