La Hatan Laen Ba Rai Liur, Fen Hetan Ameasa Ho Samurai

Arguidu ho inisial JDC tenke hatan iha tribunal, tanba lori samurai ameasa nia fen lezada ho inisial NM. (Foto: Google)

DILI, STLNEWS.co – Arguidu ho inisial JDC tenke hatan iha tribunal, tanba lori samurai ameasa nia fen lezada ho inisial NM. Antes atu tama ba iha julgamentu, tribunal homologa tiha arguidu husi krime ameasa, tanba lezada aseita atu dada fila krime nee.

Iha loron Tersa (30/09/2020), juiz prosesu lee faktus katak, arguidu ho lezada NM bolu malu nudar fen laen. Arguidu ho lezada moris nudar fen ho laen no moris ona oan nain tolu. Arguidu kostume rai samurai no kuidadu samurai iha nia uma laran. No arguidu iha planu trata dokumentu sertidaun RDTL atu ba servisu iha Inglatera, maibe lezada lakohi trata. Tanba nee arguidu hirus lezada hodi hatete katak “o halo hau hanoin barak hanesan nee hau oho tiha o, hau ba komarka ka nusa?”.

Iha loron 4 fulan Setembru 2019 mais ou menus tuku 15:00 otl, arguidu kaer hela nia samurai iha liman, hafoin bolu lezada katak “o mai lai, o tama mai para hau oho tiha o. Hafoin rona arguidu nia lia fuan refere, lezada tauk hodi halai ba vizinu nia uma, maibe arguidu duni tuir nafatin, tanba nee lezada tauk hodi halai ba postu polisia BOP nian, iha area Rotunda Comoro hodi husu protesaun.

Bainhira lezada tama tiha ba postu polisia BOP nian, arguidu tauk hodi halai fila. Konsekuensia direita husi arguidu nia liafuan no asaun refere, halo lezada sente tauk no trauma makas.

Arguidu halo hahalok nee, ho konsiente deliberada hatene hela katak, lori sasan kroat (samurai) hodi hatuk ema, nudar krime neebe lei bandu. Tanba nee MP akuza arguidu ho krime arma branka, lei numeru 05/2017 no krime ameasa neebe previstu no punidu iha artigu 157 kodigu penal Timor nian.

Hatan ba faktus nee, arguidu deklara katak, faktua balu loos no balu lalos. Arguidu deklara katak, nia amesa deit lezada la lori samurai taa, tanba deit lezada maka haruka arguidu tarata tiha dokumentus atu ba rai liur, maibe too iha klaran ona lezada la hatan atu urus tan dokumentus hodi ba Inglatera.

“Hau ameasa deit lezada, maibe hau la lori samorai atu taa lezada, deklara arguidu iha sala julgamentu Tersa, (30/09/2020). Arguidu deklara tan, samurai nee rai hela iha meza leten pas momentu nia ameasa lezada nee, maibe nia liman la kaer tok samurai ida.Hafoin liu tiha loron balu arguidu no lezada diak malu ona, no arguidu la halo tan hahalok nee.

Arguidu mos promete ba tribunal katak, iha futuru sei la halo tan hahalok nee. Lezada mos haforsa tan akuzasaun katak, arguidu ameasa deit nia, maibe la loru samurai sona nia ida. Agora sira diak malu ona. Rona tiha sira rua, tribunal husu ba iha MP atu tama ba iha alegasaun. Liu husi alegasaun, MP mantein ho akuzasaun no husu ba tribunal tetu atu aplika pena neebe masimo ka minimo ba iha arguidu.

Enkuantu husi parte defeza nian, husu absolvisaun ba arguidu, tanba arguidu la lori samurai ta lezada. Rona tiha husi parte rua, tribunal adia julgamentu ba loron seluk hodi rona desizaun ikus. Audensia julgamentu nee prezide husi juiz kolektivu, Ana Paula, Maria Solana, Ivan Suritai, MP reprezenta husi Prokurador Antonio Tavares, arguidu hetan asistensia legal husi Defensora Publika.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here