PR Dekreta Estadu Emerjensia Da-6

Prezidente Republika (PR) Francisco Guterres Lú Olo. (Photo: Media PR)

DILI, STLNEWS.co – Prezidente Republika Francisco Guterres Lú Olo, dekreta Estadu Emerjensia ba da-6 ho kbiit tomak, tuir konstituisaun neebe fo kbiit ba Xefe Estadu.

Aman ba nasaun nee dekreta Estadu Emerjensia ba da-6 hafoin rona governu, Konsellu Superior Defeza no Seguransa no Konsellu Estadu no hafoin simu autorizasaun husi Parlamentu Nasional, liu husi plenaria neebe halao iha Sabadu loron 03 fulan Outubru 2020.

“Hau deklara Estadu Emerjensia ba teritoriu tomak, ho kbiit Konstituisaun Republika fo ba hau nuudar Prezidente Republika.” dehan Prezidente Republika liu husi Dekreta Estadu Emerjensia da-6, palasiu Prezidente Nicolau Lobato, Bairru Pite, Dili, Segunda (05/10/2020).

Medida kuarentena tuir eis PPN iha Primeira Lejislatra nee katak, foti atu proteze sidadaun sira, no kuarentena halo iha fatin neebe governu organiza ka iha fatin neebe sidadaun hili rasik, maibe Ministeriu Saude tenke aprova uluk molok sidadaun tama mai.

“Hau simu informasaun katak ema balun la kumpre kuarentena no ida nee, sai preokupasaun boot ida laos deit ba orgaun soberania sira maibe ba ita hotu. Bainhira ema ida la kumpre kuarentena nia bele lori moras nee tama mai Timor Leste, karik hadaet ona iha komunidade susar tebes ba Ministeriu Saude kontrola no ita tama ba situasaun ema barak bele moras no mate,” dehan eis PPN iha primeira Lejislatura nee.

Lú Olo esplika ema hotu lakoi moras no mate ho moras COVID-19 no moras nee mai mos la hili ema riku no kiak joven ka labarik ka katuas no ferik ukun nain ka sidadaun babain. ”Hau fo hanoin fila fali karik ita la hatama ema iha fatin kuarentena ho kontrola husi Ministeriu Saude moras nee sei hadaet ba komunidade no ita bele mate mosu, iha pasi balun ospital nakonu ho ema moras COVID19 no balun obriga hela deit iha uma, barak mak mate tanba lahetan asistensia,” katak PR Lú Olo.

Xefe estadu hatutan, nia mos rona informasaun ema balun hases an husi kontrola polisia no sai tama mai iha Timor Leste liu husi dalan ilegal, balun polisia kaer balun lae, ema sira nee mak sai risku boot ba Timor Leste.*

Reportajen: Emerenciana Pinto
Editora: Carme Ximenes

LEAVE A REPLY

Please enter your comment!
Please enter your name here