Presiza Investe Iha Setor Agrikultura

Vise Diretor HAK, Sisto do Santos. (Foto: Facebook)

DILI, STLNEWS.co – Governu liu husi Ministeriu relevante presiza investe iha setor Agrikultura, atu nunee bele rekupera ekonomia iha rai laran.

Vise Diretor HAK, Sisto do Santos hatete, tuir observasaun HAK durante haree katak, irigasaun boot sira Iha Baucau Area Vemase, Manatuto area Lalaeia irigasaun boot, iha Uatu Carbau Viqueque nian, nee labele funsiona ho diak.

“Produtu sira nee bainhira irigasaun funsiona, ita mos bele mellora ita nia produsaun no ita bele rekupera ekonomia iha rai laran,” dehan nia ba STL, Iha Salaun FONGTIL Caicoli, Dili,Tersa (07/10/2020).

Nia hatete bainhira la tau prioridade ba area agrikulura hanesan, hadia irigasaun sira, tinan lima mai Timor sei nafatin depende ba produtu husi rai liur, maski TL iha produsaun.

“Bainhira ita tau importansia ba produtu rai laran, bele garantia nia kualidade nutrisaun, kualidade organiku no kualidade iha saudevel,” nia esplika.

Nia realsa Timor garantia deit ba fundus husi mina rai neebe investe iha ema nia rai, no lakohi investe iha rai laran, bainhira futuru oin mai bainhira mina maran TL laiha ona rekursu.

“Ami hanoin katak maski mina rai sei naran iha future, maibe bainhira ita investe iha ita nia agrikultura ita sei lamate, tanba Ita sei iha retornu balun no sei hetan benifisiu boot husi agrikultor sira, husi retornu nee bele ona hamenus kiak,” dehan Sisto.*

Reportajen: Santina Cardoso
Editora: Carme Ximenes

LEAVE A REPLY

Please enter your comment!
Please enter your name here