Deskonfia Seguransa Fasilita Crossing Ilegal

Xefe Estadu-Maior Jeneral F-FDTL, Major-Jeneral Lere Anan Timur. (Foto: STL/Emerenciana Pinto)

DILI, STLNEWS.co – Xefe Estadu-Maior Jeneral F-FDTL, Major-Jeneral Lere Anan Timur hatete, oras nee situasaun iha fronteira ladun diak, tanba deskonfia iha seguransa balun fasilita ema tama sai ilegal.

Jeneral Lere hatoo kestaun nee bainhira remata enkontru ho Prezidente Republika, iha Palasiu Prezidente Nicolau Lobato, Dili, Bairru Pite (Kuarta 07/10/2020).

“Problema fronteira mak problema oituan tanba ita nia seguransa sira neebe halo seguransa iha fronteira dala ruma viola buat sira nee, tanba nee mak foin lalais ami rua Komandante Polisia PNTL tuur hamutuk iha ona lista ema lubuk ida neebe involve iha ilegal sira nee,” dehan Jeneral Lere.

Jeneral Fitun Rua nee afirma, medidas neebe foti sira neebe involve hodi autoriza ema tama sai ilegal, balun sei duni sai no balun sei transfere ba Munisipiu Manatutu, Baucau, Viqueque, No Lospalos sira labele besik ba fronteira.

“Iha ami nia Forsa Armadas mos hanesan nee, ami alerta bebeik ba Komandante sira atu atensaun ho ita nia elementus neebe koloka iha fronteira, ida UPF diferente ho ami nian tanba sira iha neeba tinan ba tinan la muda, entaun sira manan ambitu aat ida halo ilegais sira nee, ami nia nee sempre muda ezemplu fulan rua ka tolu e muda ou rotasaun ida nee mak ami nia desizaun,” Jeneral Fitun Rua nee afirma.

Nia esplika, seguransa neebe mak halo seguransan iha fronteira, hodi fasilita ema tama sai ilegal kuaze ema nain sanulu resin. Iha komandante balun, ajente balun ke fasilita no sira nee naran iha hotu ona, dala ruma ida sira duni sai no sira seluk nee dala ruma kamaan be komandante atu halo transferensia ba parte Lorosae neeba labele besik fronteira

“Husu ita nia maluk neebe mak tama sai illegal nee manan konsiensia ba, tanba ilegal nee laos faan mina ka manu, maibe ilegal nee nia inpaktu mak COVID-19 nee no tama laos o deit mak mate, maibe o nia familia mate hotu, nee mak hanoin didiak mak hakat ba fronteira,” Dehan nia.

Iha biban nee mos Lere hatutan, iha hasoru malu ho Prezidente Republika koalia oituan mos kona ba Aeroportu Baucau, tanba Amerika sira agora sai preokupadu, tanba politika sira barailla sasan sira nee sai komplikadu.

“Uluk assuntu kona ba Aeroportu Baucau nee hau rasik mak trata ho admirante ou Xefe Estadu Jeneral Forsa Armadas America nian ami bazeia ba ami nia tekniku militar ida nee deit, ezemplu mai halo ita nia eskola sira halo infrastruktura ida nee, maibe agora politika sira mak mai komplikadu fali tan no ema sira nee atu halo saida lahatene, maibe ami uluk bazeia ba koperasaun militar,” dehan Lere.

Komandante nee mos husu America tenke komprende posizaun entre governu rua nee, maibe akordu formal nee seidauk iha, karik iha kooperasaun tenke ho tekniku militar hanesan halo eskola no klinika iha Baucau.*

Reportajen: Emrenciana Pinto
Editora: Carme Ximenes

LEAVE A REPLY

Please enter your comment!
Please enter your name here