Igualdade Jeneru Prioridade

(Foto: STL/Emerenciana Pinto)

DILI, STLNEWS.co – Igualdade jeneru sai prioridade ba Embaixada Australia iha Timor Leste, atu nunee bele apoiu feto iha atividade ekonomia.

Kestaun nee hatoo husi Enkarregadu Xefe Ba Embaixada Australia, Philippa Venning ba STL via telefone, Kinta (08/10/2020).

Nia dehan husi peskiza identifika aproximadamente feto pursentu 75 too 80 hanesan vensedor iha merkadu. Rezultadu nee hatudu katak prioridade prinsipal ba feto vendedor sira mak hadia merkadu lokal, inklui asesu ba bee moos no sentina sira no hadiak jestaun lixu, jestaun governansia merkadu neebe diak liu.

Philippa hatutan Embaixada Australia haksolok tebes haree peskiza ida nee, ezemplu halo daudaun ona asaun liu husi inisiativa importante hanesan Baucau Seguru, Grupu Traballu Tekniku ba Merkadu Seguru, neebe lidera husi Autoridade Munisípiu Baucau. Ida nee asegura katak feto sira nia lian ema rona ona ba dezenvolvimentu merkadu Baucau foun.

“Programa TOMAK halao serbisu iha munisípiu tolu – Baucau, Bobonaro no Viqueque. Too agora programa TOMAK atinje ona apoia ba feto benefisiariu sira kuaze 9,240 – katak iha porsentu 63 ona husi total benefisiariu hamutuk 14,747 neebe mak TOMAK atinje deste hahu iha tinan 2016,” dehan Enkarregadu Xefe Ba Embaixada Australia nee.

Venning esplika TOMAK kontinua apoia MAP hodi reforsa komprimisu ba asuntu jeneru, haklean apoia, apresiasaun ba pesoal extensionista agrikultura sira no hadiak serbisu ba feto toos nain sira, liu husi formasaun kona-ba jeneru no inkluzaun sosial ba MAP ninia funsionariu sira.

“Programa TOMAK apoia toos ba uma-kain, inklui feto no mane sira, hodi hadiak sira nia pratika halo toos nunee hetan osan liu tan husi sira nia produtu,” Vennig esplika.*

Reportajen: Emerencian Pinto
Editora: Carme Ximenes

LEAVE A REPLY

Please enter your comment!
Please enter your name here