Cazamero Pena Tinan 5 Prizaun

(Foto: Tribunal Distrital de Dili)

DILI, STLNEWS.co — Tribunal Distrital Dili liu husi leitura akordaun hamonu sentensa tinan 5 ba kondenadu Casemiro Mateus Botelho, ba kazu trafiku atividade ilisitu, tanba simu sasan pakote kompresor Air Conditioner (AC) karreta nian ho droga husi sidadaun Nigeria, ho naran Valentin Okpagu.

Tribunal kondena arguidu, bazea ba deklarasaun arguidu, sasin no dokumentu neebe junta iha atus nia laran provadu hotu, katak arguidu simu duni sasan pakote kompresor AC karreta nian tau droga iha laran.
Provadu mos katak, autoridade Alfandega prende duni sasan pakote nee iha loron 7, fulan Janeiru tinan 2019, iha Aero Portu Internasional Nicolau Lobato.
Desizaun tribunal nia bazea mos ba relatoriu hosi teste husi Polisia Judisiaria Portugal (PJP) pozitivu ho tipu sabu-sabu metavitamina, kilograma Tolu (3, 253).

Provadu mos katak, iha loron 14 fulan Janeiru, tinan 2019, polisia halo kapturasaun ba arguidu, no iha prezensa arguidu nian hodi loke makina kompresor nee, no loke iha PNSIK Caicoli, no kompresor laran nee poo mutin kristal.

Tribunal konsidera arguidu iha intensaun duni atu simu sasan pakote nee, mesmu nia destinasaun final iha Indonezia.

Hafoin desizaun tuir defeza arguidu nian, Fernando da Costa katak, konkorda ho desizaun nee, tanba tribunal konsidera nee hanesan kulpa ida.

“Pontu ida hau kontenti, mesmu ita haree nia grau de krime nee boot, maibe nia hetan pena neebe mak tuir estandar katak tinan lima. Ninia modura penal lolos nee 5 ate 15 anus, maibe tribunal foti ida kraik liu” hatete advogadu privadu iha TDD Kinta nee.

Tuir prosedimentu legal, parte defeza rasik halo rekursu prazu loron 15, maibe defende ba familia arguidu nian. Desizaun ikus nee mos tribunal deside absolve arguidu hosi krime agravasaun iha artigu 9, nune tribunal hamonu sentensa ba kondenadu ho pena tinan lima, ho artigu 7 konaba trafiku atividade ilisita, hosi lei numeru 02/2017 konaba kombate trafiku no konsumu ilisitu ba droga.

Nunee mos konaba objetu aprendidus neebe autoridade polisia prende, hanesan telemovel ho marka OPPO F11, ho kartaun sim, osan USD $600 neebe arguidu simu hosi Nigerianu, sei afavor ba estadu, tanba sasan sira nee mak fasilita arguidu kontaktu ho sidadaun Nigerianu, maibe passaporte mak sei devolve fali ba arguidu.

Audensia julgamentu nee prezide husi juiz kolektivu, ministeriu publiku reprezenta husi prokuradora Lidea Soares no arguidu hetan asistensial legal husi Advogadu Privadu.*

Reportajen: Terezinha de Deus
Editora: Ekipa STL

LEAVE A REPLY

Please enter your comment!
Please enter your name here