FRETILIN Sauda Maun-Alin CNRT

Xefe Bankada FRETILIN, Deputadu Francisco Miranda Branco. (Foto: STL/Domingas Soares)

DILI, STLNEWS.co – Hafoin Proposta Orsamentu Jeral Estadu (OJE) 2020 aprova iha final global, bankada Fretilin nuudar bankada apoiu governu, saude bankada CNRT nuudar bankada opozisaun nomos nuudar maun alin iha uma Fukun Parlamentu Nasional (PN).

Liafuan Saudasaun nee hatoo husi Xefi Bankada Fretilin Francisco Branco Kinta (08/10/2020) iha PN bainhira debate OJE 20202 aprova iha final global.

“Ami hahu hodi sauda no kumprimenta opozisaun, tanba sira mos ita nia maun alin, iha uma lulik Republika Demokratika Timor-Leste (RDTL) nian. Ami husu atu sira bele simu realidade politika neebe hatuur sira ohin loron iha opozisaun, ami espera katak sira bele ultrapasa situasaun ida nee, situasaun neebe oras nee daudaun sira hasoru maka situasaun post power syndrome, ita tenke kompriende. Ami hakarak kongratula ita hotu neebe halo esforsu makas durante audensia publika, debate no ikus mai vota ba projetu de lei OJE 2020 hodi viabiliza governu ida nee ba situasaun ida-neebe konfortavel liu tan.

Deklara Branco iha sesaun plenariu debate proposta OJE 2020 depois aprova iha Final Global Kinta (08/10/2020) iha PN.

Nia hatutan Bankada FRETILIN fo valor aas ba politika VIII Governu Konstitusional, neebe lidera husi Primeiru Ministru Taur Matan Ruak hodi hatuur Ema iha sentru ba politika dezenvolvimentu nasional. Tanba tinan naruk, la hatuur Ema nudar sentru ba politika dezenvolvimentu nasional, ita bele haree numeru konkretu setor saude, setor edukasaun, turizmu no agrikultura lafo atensuan, neebe povu 70% moris ba, haluha tiha, tinan barak.

Nia informa OJE 2020 aloka ba medida rekuperasaun ekonomika kurtu prazu, $113 millaun de dolares, neebe sira fiar sei sirkula tomak iha rai laran, sei fo benefisiu diretu ba povu, agrikultor sira, toos nain sira, komersiante sira, fiar governu sei implementa ho programa ida nee. Medida ida-nee hatudu VIII Governu nia kompromisu ba dezenvolvimentu setor agrikola, no sira hanoin setor peska mos neebe importante tebes ba diversifikasaun ekonomia.

Entretantu iha setor saude, bankada FRETILIN kongratula no enkoraja nafatin profisional sira nia esforsu aan no vijilante liu tan, iha prevensaun no kombate hasoru virus Covid-19. Husu atu iha lina koordenasaun programa ida nee ho ministeriu no instituisaun relevante sira seluk, no fo mos atensaun boot ba stock aimoruk atu labele falta iha Ospital Nasional, Ospital Referal sira, klinika no postu saude sira, hodi fo asistensia ba povu.

Enkuantu iha setor edukasaun, presiza hadia duni infraestruturas, maibe elementu importante tebes maka investe ba kualidade rekursu umanu iha rai laran, eleva kapasidade profesores, nunee mos tenke iha livru barak ba eskola, liu-liu iha area remota hodi intensifika estudante sira hatoman aan ho leitura hahu husi idade nurak. Nunee mos iha setor infraestrutura, presiza iha lina kooodenasaun programa ida nee liu tan entre transporte no telekomunikasaun, eletrisidade ho bee-moos no saneamentu, obras publikas ho ADN, hamutuk ho Planu no Ordenamentu, atu povu bele asesu ba estrada, bee-moos no eletrisidade.

FRETILIN apoiu VIII Governu nia politika ba dijitalizasaun neebe sei hadia administrasaun publika, no loke asesu internet programa ida nee no lais liu ba sidadaun hotu-hotu, liuliu ba estudante sira iha area remota no iha Timor-Leste, ho investimentu ba fibra óptika husi Costa-Sul. Sira rekomenda Primeiru Ministru, bele halo revizaun ba investimentu nee ho montante, tuir prinsipiu boa governasaun.

Iha setor petróleu, ami insentiva empreza publika Timor Gap ho nia jerénsia foun atu pro ativu liu, hasae produtividade nunee jere reseita ba estadu. Setor privadu nudar governu nia parseiru, tenke hetan tratamentu ida dignu ho baze iha regras, setor privadu tenke hetan tratamentu adekuadu, labele sai fali atan no ikus mai selu tusan deit, ezemplu bainhira kompania ida la remata obra tuir prazu kontratu, hetan multa ka sansaun, maibe bainhira kompania remata nia obra tuir prazu la hetan pagamentu tanba governu laiha orsamentu atu selu”, deklara Branco.

Nia afirma, Organização Para a Cooperação e Desenvolvimento Económico (OCDE) hodi konsidera Timor-Leste sai husi país frájil, ho politika dezenvolvimentu nasional neebe hatuur Ema iha sentru, sira fiar no iha esperansa katak mandatu sei iha susesu no sei lori mudansa no progresu rai no povu.

Tuir nia, bankada FRETILIN elojia no fo votus de susesu ba xefi VIII governu ho nia elenku governativu, neebe foin mak remata 100 dias de governação, maibe hatudu ona diferensa barak, liu-liu iha proposta OJE 2020. Iha oportunidade ida nee bankada FRETILIN apela PM no membru governu hotu, atu hadia no hametin liu tan lina koordenasaun inter-ministeriál no entre instituisaun sira hotu, nunee bele implementa politika VIII Governu nian ho efisiénsia no efikásia, hasae kualidade servisu, kualidade projetu, tuir prinsipiu transparénsia no boa governação bele hatudu diferensa.*

Reportajen: Guilhermina Franco/ Domingas Soares
Editora: Ekipa STL

LEAVE A REPLY

Please enter your comment!
Please enter your name here