EE Ligadu Pandemia Covid-19, Prosesu Balu Paradu

Juiz Administrador Tribunal Distrital Dili Afonso Carmona. (Foto: STL/Terezinha de Deus)

DILI, STLNEWS.co – Durante estadu emerjensia iha fulan tolu Marsu Abril Maio, ema labele halao servisu hanesan babain, tanba nee iha nia impaktu ba prosesu balu paradu.

Lia hirak nee hatoo husi Juiz Administrador Tribunal Distrital Dili Afonso Carmona, ba STL iha TDD Sexta, (09/10/2020).

“Durante estadu emerjensia ba Covid-19 nian, konaba impaktu prosesu tama iha tribunal ba estadu emerjensia fulan tolu uluk nian, iha impaktu hotu hotu la servisu prosesu balu paradu, too numeru prosesu foun nian aumenta,” dehan Carmona.

Nia hatutan, iha fulan Junnu too mai agora estadu emerjensia lao nafatin, maibe tribunal nia funsaun lao nafatin, hodi halao julgamentu lao normal.

Tanba nee impaktu ba prosesu paradu iha fulan tolu estadu emerjensia nian, neebe hahu iha fulan Marsu, Abril, Maiu, maibe iha Junnu prosesu lao normal, no iha Agostu Setembru ferias judisial halo prosesu nia numeru sae, maibe iha 16 Setembru tribunal hahu tama fali julgamentu, no prosesu lao normal.

Hatan konaba durante Covid-19 nee prosesu aumenta ka menus, nia parte dehan Covid-19 nee tribunal labele termina prosesu tama, tanba hein akuzasaun mai husi Ministeriu Publiku.

Nunee iha fulan tolu primeru governu dekreta estadu emerjensia, Ministeriu Publiku la hatoo akuzasaun, tanba nee labele dehan akontese, se akontese aktu urjente. Tanba iha fulan tolu nee, koalia deit konaba prosesu urjente.

Juiz nee dehan, agora dadaun tribunal halao nia servisu, atu redus prosesu pendente iha estadu emerjensia hahu nee, no prosesu neebe tama.

Iha fatin ketak Defensor Publiku Sergio Dias Quintas dehan, iha estadu emerjensia ligadu ho Covid-19, prosesu krime aumenta tanba desempregu barak.

“Krime nee laos atu hamenus maibe aumenta, tanba ho estadu de emerjensia nee, depois ho Covid-19 nee halo timor izoladu ba mundu kria desempregu barak, hamosu problema sosial barak,” dehan nia.

Sergio hatutan, husi dezempregu barak numeru krime sae, tanba Timor enfrenta impase politika, no pandemia Covid-19 nee, nia implikasaun halo kirme sae.

Hanesan defensor hatoo nia rekomendasaun katak, krime semi publiku sei too iha polisia ka ministeriu publiku, parte rua nee bele halo tentativa konsiliasaun, atu krime rua nee labele too iha tribunal. Tanba se krime semi publiku tama iha tribunal, halo prosesu nee barak liu tama iha tribunal.

Nunee mos governu kria kondisaun balu ba sosiedade, atu kria empregu ba joven sira, atu redus problema iha sosiedade, no numeru kirme bele tun.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here