Suku Sapatu, Hodi Ajuda Kbiit Laek

SUKU SAPATU- Difisiente Aje Dos Santos suku Sustenta Nesesidade Moris, Sesta (9/10/2020). (Foto: STL/Donaciano Magalhães)

DILI, STLNEWS.co – Maski moris ho kondisaun difisiente Aje dos Santos, lalakon esperansa buka osan iha dalan ninin liu husi suku Sapatu, hodi ajuda familia kbiit laek sustenta vida moris.

Servisu ida nee Aje halao durante tinan barak ona, nunee bainhira Pandemia COVID-19 mosu fo ameasa ba ema nia vida no ekonomia mundial inklui Timor Leste.

Bainhira Timor Leste hetan kazu Pozitivu Pandemia COVID-19 ida iha Fulan Marsu 2020, Prezidente Republika Francisco Guterres Lú-Olo, Liu husi Autorizasaun Parlamentu Nasional, dekreta kedas Estadu Emerjensia ba dauluk hodi hapara provizoriu aktividade sira neebe involve ema barak.

Ho objetivu prevene sirkulassun moras COVID-19, iha komunidade nia let, kompania privadu balun hapara ona nia traballador, tanba laiha osan atu selu salariu, povu kbiit laek komesa halerik ba hamlaha tanba laiha osan hodi sosa hahan, buat hirak nee hotu hafanun Aje atu ajuda maluk Timor Oan sira durante periodu Estatu Emerjensia.

“Maski ajudus neebe hau fo nee la boot, maibe bele ajuda netik ona hau nia maluk sira nia moris iha loron ida rua, ” dehan Aje ba STL, iha Beto, Suku Madohi, Munisipiu Dili, Sesta (09/10).

Osan neebe Aje hetan balun nia uza ba ninia an no balun nia uza sosa fos, mina ho supermi, fahe ba familia kbiit laek sira, maski sasan neebe nia fahe ladun iha Valor boot, maibe bele halo kaman ona naha todan neebe familia kbiit laek sira hulan.

“Hau difisiente maibe hau hakrak ajuda hau nia maluk sira, kuandu hau iha osan hola netik buat ruma hodi fahe ba maluk sira neebe persiza, hau lakohi tane liman ba ema seluk inklui governu, tanba nee hau buka rasik mak han, buka rasik mak han nee valor bot tebes.” tenik Aje.

Antes nee Aje ho nia besik leta roda 3 neebe uza osan rasik hodi selu ema solda, sirkula iha Kapital Dili Laran, hodi faan pulsa telefone no aifuan fresku, iha fatin publiku sira hanesan Largo, Lecidere Jardin BJ Habibie, Jardin 5 de Maiu.

Aje relembra durante faan sasan iha fatin publiku nia sempre hetan samada husi Guarda Munisiu Dili, tanba nee nia deside hodi buka fatin neebe seguru hodi suku sapatu, atu nune guarda Munisipiu dili, labele hase ka fo samanda tan ba nia.

Agora dadaun Aje ho nia maluk difisiente nain 20 resin aluga hela komunidade nia uma iha Aimutin, Besik Hotel Ramelau. Uma nee Aje ho nia maluk sira kada fulan selu dollar Amerikanu 100.

“Ami nain 20 mak aluga uma nee, kada fulan ema ida hatama osan $5 tau hamutuk selu ba koss nain,” Aje salienta.”

Reportajen: Donaciano Magalhaes
Editora: Carme Ximenes

LEAVE A REPLY

Please enter your comment!
Please enter your name here