Tenke Kumpri Estadu Emerjensia Da-6

Eis Dosentes UNPAZ, Amilcar Araujo dos Reis. (Foto: STL/Carme Ximenes)

DILI, STLNEWS.co – Ema hotu tenke kumpri Estadu Emerjensia ba da-6, neebe Prezidente Republika dekreta, atu nunee bele prevene COVID-19 iha rai laran.

Kestaun nee hatoo husi eis Dosentes UNPAZ, Amilcar Araujo dos Reis ba STL, iha Manleuana, Dili, Tersa (13/10/2020).

Nia dehan, liu husi autorizasaun Parlamentu Nasional Prezidente Republika dekreta ona Estadu Emerjensia da-6, tanba nee ema hotu tenke kumpri.

“Ita haree dekretu nee kumpri ona regas sira neebe lei haruka, tanba nee ita husu ba sidadaun hotu-hotu tenke kumpri, laos kumpri tanba diak ema ida nian, maibe tanba ita hotu nia an,” dehan nia.

Amilcar hatutan, koalia kona ba moras COVID-19, laos koalia kona ba funu, funu karik uluk ema tiru malu sira nee. “Ita halai husi neeba, mais ida nee lae, tanba nee hau husu atu ita hotu-hotu kumpri buat neebe saude rekomenda, koidadu ho distansia, sei ita kumpri didiak laiha trasmisaun moras nee ba ema seluk, hau fiar Timor Leste bele hakat liu dezastre ida nee,” nia eplika.

Eis Dosentes UNPAZ nee afirma governu no Prezidente Republika foti desizaun ruma husu para tenke kumpri regas, atu nunee moras nee labele hadaet, agora atu hadaet ka la hadaet depende ba sidadaun ninia komprotamentu.

Tanba COVID-19 neebe hamosu risku tebes ba ema, nomos ema mate barak. Situasaun ida nee presiza duni efetiva para prevene.

Nia dehan, Organizasaun Mundial Saude deklara ona no apela ba mundu hotu-hotu neebe efetivu, atu halo prevensaun ba COVID-19.

“Ita iha Timor Leste too ohin loron tuir dadaus neebe iha katak, kazu pozitivu COVID-19 ida, ohin loron hotu hotu tenke prontu hatan halo funu hasoru COVID-19, maibe Estadu dever tomak oinsa funu hasoru virus Corono,” dehan nia.

Nia afirma, hanesan sidadaun bain bain apoiu tomak ba medidas ida nee, atu nunee bele antesipa Corona virus iha rai laran.*

Reportajen: Carme Ximenes
Editora: Carme Ximenes

LEAVE A REPLY

Please enter your comment!
Please enter your name here