Covid-19 Halo Ekonomia Monu; Governu Tenki Kria Kondisaun

Xefe Peskizador Universidade Dili (UNDIL), Filipi da Silva (Foto: STL/Crisogono Magalhães)

DILI, STLNEWS.co – Ligadu ho situaaun ekonomia rai laran impaktu husi Covid-19, halo forsa no kbiit ema hola sasan tun, tanba nee governu tenki kria kondisaun neebe diak hodi hadia hamoris fali ekonomia rai laran.

Lia hirak nee hatoo husi Filipi da Silva, Xefe Peskizador Universidade Dili (UNDIL) ba STL iha nia Knaar Fatin,Maskarenhas, Tersa (13/10/2020).

“Opsaun neebe Governu uza hodi rekopera situasaun ekonomia rai laran, ita hare seidauk bele garantia hodi rekopera ekonomia Timor-Leste, tanba Covid-19 nee rasik, ita hotu hatene katak fo impaktu neebe boot ba iha ekonomia rai laran, desde Governu desidi implementa Estadu Emerjensia,” dehan Filipi.

Nia dehan, impaktu boot husi Covid-19 nee maka halo atividade hotu-hotu neebe liga ho ekonomia rai laran paradu, desde Governu desidi implementa Estadu Emerjensia hahu husi Estadu Emerjensia dahuluk to da neen, ita hare atividade esportasaun la lao no ita depende liu ba iha atividade Importasaun deit, iha parte balu projetu neebe finansia husi Orsamentu Jeral Estadu (OJE) mos paradu, nunee halo ema barak lakon nia oportunidade servisu no rendimentu mos menus.

“Nunee halo povu sai halerik ba rendimentu, ho nee halo forsa no kbiit povu atu hola sasan iha merkado mos tun, mesmu sasan folin iha merkado no presu sasan iha merkado lao hanesan bain-bain, maibe, kbiit ema atu sosa nee maka tun, “haktuir nia.

Nia Akrenta, se ema ida lakon nia servisu, no atividade ekonomia la iha oinsa atu rekopera ekonomia.

“Tanba nee governu tenki kria kondisaun hamoris fali ekonomia rai laran, hodi hasae fali ekonomia rai laran, nunee bele hasae fali kapasidade ema atu hola sasan iha merkadu,” akresenta nia.

Nia akresenta liutan, governu tenki kria fundus emerjensia ba atividade ekonomia rai laran nunee bele fasilita atividade ekonomia bele lao diak liutan.

“Ita mos hare katak iha situasaun Covid-19 nee governu promete 60% ba traballadores hodi rekopera sira nia ekonimia uma laran maibe to ohin loron traballadores barak mak ssidauk simu,” komenta Nia.

Akademista nee komenta liutan, problema hirak neebe ohin temi ona nee, nia hun maka, Governu seidauk iha seriedade atu hadia povu nia moris iha situasaun Covid ida nee i sistema neebe maka governu estabelese nee seidauk garantia para bele rekoperasaun ekonomia.*

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here