TDD Julga Empreza Balu Debe Osan U$20,000.00

(Foto: Tribunal Distrital de Dili)

DILI, STLNEWS.co — Tribunal Distrital Dili realiza julgamentu ba arguidu DEP hanesan emprezariu Indonezia neebe loke negosiu iha Timor-Leste, halo falsifika dokumentu no debe ema nia osan ho montante rihun U$20,000.00 laselu.

Tuir faktus katak, iha loron neebe lezadu AJ haluha, maibe iha fulan Outubru 2014 arguidu DEP ba iha lezadu nia loja Super Xerox hodi hatete ba lezadu katak, karik lezadu atu faan pulsa Telkomsel, bele fo osan liu hosi arguidu no arguidu mak ba sosa hafoin nia lori pulsa ba entrega lezadu.

Lezadu senti ideia arguidu nian diak, nunee bainhira arguidu ba husu osan U$ 20.000.00 (dolares amerikanu rihun rua nulu), atu lori ba sosa pulsa Telkomsel ba lezadu faan iha nia loja, lezadu mos aseita hodi entrega osan ho valor iha leten ba arguidu.

Maibe, hein too semana ida nia laran, arguidu la lori pulsa Telkomsel ba entrega ba lezadu no laiha informasaun hosi arguidu kona ba osan nee, nunee lezadu husu resibu selu pulsa nian, maibe arguidu la fo.

Tanba lezadu husu bebeik resibu no arguidu la fo nafatin, liu tiha sema tolu hanesan nee, lezadu deside hodi kansela sosa pulsa Telkomsel hodi husu fali nia osan, maibe arguidu la fo nafatin lezadu nia osan.

Lezadu ezije bebeik nia osan atu arguidu entrega fila fali, arguidu lori resibu rua ba entrega ba lezadu no hateten katak, osan nee arguidu lori ba selu tiha loja neebe lezadu arrenda iha Fatuhada Dili.

Maibe, lezadu hakfodak tanba iha fulan Abril tinan 2015, loja nain Kumpania Time Square Development, Lda, lori invoice ba husu pagamento ba arrendamentu loja nee ninian hahu fulan Janeiru too fulan Marsu tinan 2015.

Lezadu nia empregada hateten ba Kompania Time Square Development, Lda katak osan arrenda loja nee selu tiha ona.

Lezadu nia empregada mos foti resibu neebe arguidu entrega hodi hatudu ba Kumpania nee, maibe Kumpania hateten katak, resibu ida nee laos hosi sira nia kumpania.

Kompania foti sira nia invoice hodi hatudu no dehan katak “ami nia inovoice maka nee, selu ona karik, ami fo ami nia invoice hanesan nee. Tanba nee, lezadu mos foti osan hodi selu kedas osan arrendamentu ba loja nian. Iha loron 22 fulan Dezembru tinan 2015, arguidu halo deklarasaun ida ho lingua Indonesia katak nia mak foti dunik osan US$ 20,000.00 hosi lezadu no sei rezolve iha fulan Agostu,

Maibe too oras nee arguidu la fo fila nafatin lezadu nia osan Konsekuensia hosi hahalok arguidu ninian, hamosu prejuizo patrimonial ba lezadu osan ho valor USS 20,000.00 (dolares amerikanu rihun rua nulu).

Arguidu komete aktu nee ho forma livre, konsiente no deliberada, hatene katak lohi lezadu fo osan ba sosa pulsa Telkomsel, maibe arguidu utiliza fali osan nee ba nia interesse nudar aktu neebe proibi no punidu tuir lei penal.
Arguidu mete aktu nee ho forma livre, konsiente no deliberada, hatene katak halo resibu falsu hodi hetan benefisiu ba ninia aan, nudar aktu neebe proibi no punidu tuir lei penal.

Tanba nee Konstitui arguidu DEP nudar autor material ho forma konsumadu iha konkursu krime rua, kompostu hosi krime abuza konfiansa agravadu no krime ida seluk falsifikasaun ba dokumentu no tasaun teknika, previstu no punidu tuir arts. 257° n°1 no 303° n.°1 al. a) hot-hotu hosi Kodigu Penal.

Entretantu, ba prosesu nee tribunal labele rona arguidu, tanba arguidu fiksa edital (halai hosi justisa), no lezadu rasik mos la marka tanba moras halo tratamentu iha indonesia (fase ran).

Tanba nee Tribunal rona direita deit sasin ho naran Maria Freitas Soares, konfirma katak nia hare ho matan bainhira vitima entrega osan ba arguidu hodi empresta.

Sasin sei lembra katak momentu arguidu ba foti osan, atu hodi sosa pulsa telkomsel para faan.

Rona tiha sasin nee, tribunal husu ba iha MP atu submete ba iha alegasaun.
Liu husi alegasaun, MP solisita ba iha tribunal katak, arguidu nia hahalok priense hotu rekejitus subtantivu sira, tanba nee ministeriu publiku solisita atu tribunal aplika pena ida neebe mais aduakudu tuir konviksaun tribunal nian.

Ekuantu parte defeza, Advogadu privadu mos aseita ho Ministeriu Publiku nia pedidu, no husu atu aplika pena justu.

Rona tiha husi parte rua, Tribunal adia hikas julgamentu ba loron 29/10 hodi rona desizaun ikus.

Audiensia nee prezide husi juiz kolektivu, parte ministeriu publiku nian reprezenta husi prokurador nain ida, arguidu hetan asistensia legal husi advogadu privadu.

Reportajen: Terezinha De Deus
Editora: Carme Ximenes

LEAVE A REPLY

Please enter your comment!
Please enter your name here