Uza Kareta Loron Ferias, MP Alega ECP Prizaun Fulan 6

Husi alegasaun, Ministeriu Publiku (MP) solisita ba tribunal aplika pena prizaun fulan 6, suspende tinan ida ba arguidu ho inisial ECP. Tanba provadu, uza kareta estadu ba loron ferias. (Foto Ilustrasaun: RL)

DILI, STLNEWS.co — Husi alegasaun, Ministeriu Publiku (MP) solisita ba tribunal aplika pena prizaun fulan 6, suspende tinan ida ba arguidu ho inisial ECP. Tanba provadu, uza kareta estadu ba loron ferias.

Tuir MP nia haree katak, arguidu hanesan funsionariu publiku iha Dirasaun Komersiu Internu, sub-tutela ba Ministeiru Turizmu, Komersiu no Industria hanesan motorista. Tanba nee MP husu ba tribunal aplika pena prizaun fulan 6, suspende ba tinan ida.

Maski nunee, parte defeza, husu tribunal aplika deit pena administrasaun ba arguidu, tanba haree ba arguidu nia arependementu.

Rona tiha parte rua, tribunal adia audiensia ba loron 29 Fulan Outobru 2020, tuku 5:00 lokraik hodi lee leitura sentensa.

Tuir faktus katak arguidu ECP, hanesan funsionariu publiku iha Dirasaun Komersiu Internu, sub-tutela ba Ministeiru Turizmu, Komersiu no Industria hanesan motorista.

Iha loron 25 fulan Maio 2019 iha operasaun konjunta kompostu husi KAK no PNTL tranzitu iha Kuluhun Dili.
Haleu tuku 10.00, ekipa kaer toman arguidu ECP, konduz kareta Estadu ho matrikula 03-163 G, iha loron ferias hodi tula ai maran iha Kuluhun ba nia uma iha Mascarinhas.

Kareta estadu ho matrikula 03-163 G, marka Toyota Hilux, kor Cinzenta neebe pretense ba Ministeriu Turismu, Komersiu no Industrial (MTCI).

Bazeia ba ordem serbisu, Dirasaun Komersiu Internu entrega kareta refere ba Senora Natalina M. A da Costa hodi halao viazen serbisu durante loron 2 hahu husi 14 too 20 fulan Maiu tinan 2019.

Arguidu hanesan funsioanriu publiku, uza sasan estadu neebe maka lei la foo dalan ba nia atu para iha nia uma no uzu ba nia atividade privada, iha loron ferias nia laran, maibe nia kontinua halao ho intensaun hodi hetan vantajen ilijitimu no kauza prezuiju ba Estadu RDTL.

Arguidu hatene katak nia hahalok nee kontra lei, mesmu hanesan nee nia kontinua halao hahalok ilisitude refere hodi benefisia nia an no nia familia no fo prejuizu ba estadu RDTL.

Audiensia nee prezidi hosi juiz singular, Zulmira Auxliadora, Ministeriu publiku reprezenta prokuradora Lidia Soares, no arguidu hetan asistensia legal hosi defensor Publiku Afonso de Jesus.*

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here