Falsifika Dokumentus Veteranus; TDD Kondena Arguidu Sira Husi Tinan 3 too 9

Tribunal Distrital Dili iha loron Sesta (16/10/2020), liu husi leitura akordaun ba krime Burla Agravadu, kondena arguidu nain lima, absolve arguidu nain rua, no fo pena suspensaun ba arguidu nain rua. (Foto: STL/Terezinha de Deus)

DILI, STLNEWS.co – Tribunal Distrital Dili iha loron Sesta (16/10/2020), liu husi leitura akordaun ba krime Burla Agravadu, kondena arguidu nain lima, absolve arguidu nain rua, no fo pena suspensaun ba arguidu nain rua.

Arguidu nain sia nee mak hanesan, Joaquim Silva, Osvaldo Paulo, Mario de Araujo, Marcelino Pereira, Agustinha da Costa Maria, Constatino de Jesus Maia, Celio Maria Noronha Lay, Delio de Jesus Campo, Domingos Mendonsa.

Iha leitura nee, tribunal absolve arguidu Celio Maria Noronha Lay, no Constantino de Jesus Maia, tanba la iha provas ida, maka indika katak arguidu nain rua envolve iha krime nee.

Nunee tribunal mos aplika pena prizaun fulan tolu, suspende fulan tolu, ba arguida Agustinha da Costa Maria, no arguidu Marcelino Pereira, tanba hanesan ema neebe apoiu hasai foto hodi kompleta dokumentus sira.

Foto: STL/Terezinha de Deus

Nunee tribunal kondena pena prizaun efetiva, ba arguidu Domingos Mendonça tinan tolu, Delio De Jesus Campo tinan neen, Mario de Araujo tinan lima, Osvaldo Paulo tinan hitu, Joaquim Silva tinan sia, tanba konsidera hanesan ema neebe foti osan no simu osan.

Iha desizaun nee, juiz prosesu mos husu ba iha parte prokurador no defeza la satisfaz ho desizaun nee, bele halo rekursu ba tribunal rekursu, tuir prazu neebe iha.

Antes nee, tribunal mos halo alterasaun kualifikasaun juridiku nee, tribunal altera fali krime falsifikasaun dokumentus ba iha krime burla agravadu. No alterasaun nee ba iha arguidu M, P, A no D.

Tuir faktus katak, prosesu hamutuk arguidu nain sia ho naran, JS (mate restu), OP, MA, MP, AC, CJM, CNL, DJC no DM hosi sira nee balu hanesan funsionariu BNU neebe deskonfia fasilita arguidu sira transfer osan ba malu ho total osamentu valor U$77,362.00 neebe estadu atu selu pensaun nuudar veteranus ba sira nia konta bankaria privadu liu hosi Banku BNU.

Entretantu hosi indisus forte kontra arguidu sira katak, Lezada ABA nudar rekerente pensaun ba martires kombatente, SA nudar rekerente pensaun ba martires ba kombatente, IA nudar rekerente pensaun ba martires kombatente no ADC, mos nuudar rekerente pensaun ba martires kombatente.

Lezadu sira hanesan, FDCAS, MMC, JMBM, MC alias “Miki”, TB, AC, nuudar rekerente neebe mak trata namas pensaun martires no mos sobrevinte, no sai vitima ba hahalok arguidu DM.

Foto: STL/Terezinha de Deus

Arguidu sira hanesan JS, “Mate Restu”, MA, MP, OP, ACM alias “Atina”, CJM “Costa”, DJC Alias Oko, DM, sira konese malu no sira forma rede ida hahu husi buka lezadu neebe mak trata dokumentu pensaun ba martires no sobrevivensia, balun halo knar hodi falsifika eleitoral, balu halo knar hanesan uza nia oin hodi hasai fotografia hodi taka iha kartaun eleitoral hodi sai hanesan nian ba osan pensaun bainhira halo levantementu osan pensaun iha banku BNU.

Tanba nee Ministeriu Publiku akuza arguidu sira ho krime Burla Agravadu tuir artigu 267, Falsifikasaun Agravadu artigu 304 falfika dokumentu publiku, artigu 305, korupsaun aktiva artigu 294, krime furtu agravadu tuir artigu 252 no krime korupsaun pasiva iha aktu elisitu iha artigu 292 numeru 1 hosi lei kodigu Penal Timor-Leste nian.

Audensia julgamentu nee prezide hosi juiz Antonino do Carmo, Ivan Antonino no Maria Solana, parte Ministeriu publiku reprezenta prokuradora Lydia Soares, Rogerio Viegas, no arguidu sira hetan asistensia legal hosi Defensor Publiku no Advogadu Privadu.

Reportajen: Terezinha de Deus
Editor: Ekipa STL

LEAVE A REPLY

Please enter your comment!
Please enter your name here