OJP Likisa Pronto Fo Vitoria CNRT

Prezidente Organizasaun Juventude Partidu (OJP) Congresso Nacional para a Reconstrução de Timor-Leste (OJP-CNRT) Munisipiu Likisa, iha esperansa boot hodi garantia vitoria ba Partidu CNRT iha eleisaun 2023 mai. (Foto: STL/Crisogono Magalhães)

LIKISA, STLNEWS.co – Prezidente Organizasaun Juventude Partidu (OJP) Congresso Nacional para a Reconstrução de Timor-Leste (OJP-CNRT) Munisipiu Likisa, iha esperansa boot hodi garantia vitoria ba Partidu CNRT iha eleisaun 2023 mai.

Lia hirak nee, hatoo husi Kordenador OJP Munispiu Likisa, Abril Pereira, ba STL iha Sede CNRT Likisa, Domingo (18/10/2020). Nia dehan hanesan Prezidente OJP CNRT iha Munisipiu Likisa, nia kaer joven lubuk ida desde tinan 2015-2019, OJP Likisa iha ona membru estrutura OJP nian kada Postu nain 10, Suku nain 10 no aldeia sira nain 5.

“Total estrutura OJP Munispiu kada suku 23, neebe ami iha 234 pesoas estrutura OJP nian, husi total aldeia 134, neebe total nee hamutuk 670 pesoas estrutura OJP nian iha baze,” dehan nia.

Nia haktuir, politika OJP CNRT nian, kada ema ida, tenki buka votantes foun nee menus liu nain rua, barak liu maka nain 5, tanba nee maka ohin loron ita realiza atividade konsoliadasaun OJP, hodi akumula joven sira neebe kategoria ba iha new voter (votante foun).

“Atividade nee halo para kaer alin sira joven, neebe ita bolu dehan votantes foun, atu sai hanesan membru permanente OJP CNRT,” haktuir nia.

Nia katak, planu ba oin nee maka sira sei halo atividade hanesan iha Postu Administartivu hodi hametin liutan estrutura CNRT nian iha baze, liga ba programa ida ohin.

“Orsamentu neebe ami uza ba atividade neene, orsamentu mai husi nasional i iha mos apoiu balu husi maluk kompaneiru sira seluk hodi fo suporta ba atividade OJP Munisipiu Likisa, ba oin sira sei halo atividade boot iha kada postu, tanba nee sira husu apoiu masimu ba estrutura nasional partidu CNRT hodi fo suporta ba sira nia atividade neebe sei realiza iha kada postu, hodi rekruta tan membru foun permanente OJP CNRT,” akresenta nia.

Nia akresenta liutan, objetivu husi atividade ohin nee maka, fo posse ba membru foun OJP Munisipiu Likisa nian neebe kompostu husi Likisa Vila.

“Total posante neebe atu simu pose nee hamutuk tuir lista hamutuk 50 pesoas, maibe ohin balu mai aumenta tan, nunee total ohin atu simu posse porvolta 70 i tal, ami rejistu husi Likisa Vila, trajeitu ami nia tenki liu 250, tanba iha failansu oituan, nunee ohin Likisa Vila maka simu uluk pose, Postu sira seluk depois de ida nee ami sei ba fo pose,” komenta nia.

Iha fatin hanesan,Vise CPN Partidu CNRT, Bendito Freitas, haktuir, joven sira maka sai hanesan future, wainhira sira desidi aan hakarak sai membru partidu CNRT, sira tenki simu formasaun neebe adekuada i formasaun neebe intensiva, hodi orienta ba sira nia preparasaun liu-liu ba partidu politiku.

“Tanbe nee edukasaun politika ba membru foun sira nee importante tebes, hodi hanorin sira oinsa atu respeita malu, iha toleransia ba malu, se partidu politiku ida maka la ajuda nia militante liu-liu ba joven sira, entaun joven sira nia atitude no komportamentu politiku nee, diferente tiha ona husi lina neebe mai husi leten,” hatete Vise CPN nee.

Nia hatete, tanba nee maka Partidu CNRT ho nia estrutura, tenki halao nafatin formasaun.

“Hodi konsentiza, konseitu valores demokrasia, toleransia, respeitu mutu ida nee maka importante tebe-tebes,” tenik nia.

Husi observasaun neebe STL asesu iha terenu, iha atividade konsolidasaun nee hetan partisipasaun masimu husi estrutura nasional OJP CNRT, Vise CPN CNRT Bendito Freitas, Aderito Hugo, Dionizio Babo, eis Prezidente Timor GAP Francisco Monteiro, Alexandrino Araújo Xavier, estrutura CNRT Munsipiu Likisa, no estrutura OJP Likisa.*

Reportajen: Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here