DILI, STLNEWS.co – Crosser atus ida resin hosi nasional no internasional kompete iha eventu Pertamina Internasional Timor Road Race 2023, neebe halao iha Tasi Tolu-Dili, durante loron tolu (18 to’o 20 Agostu 2023) hodi harame loron FALINTIL ba dala 48 (20 Agostu 1975-20 Agostu 2023).
Eventu Pertamina Internasional Timor Road Race 2023 ba loron dahuluk, crosser Timoroan ho internasional kompete iha Klase Metic 115 CC-150 CC, Klase Bebek 2 Tak 115 CC-155 CC, Klase Sport (King-Ninja) 115 CC-200 CC no Klase Trail 150 CC-200 CC.
Crosser Timoroan ho naran Gleen sai fitun iha kompetisaun Road Race nee, tanba ho idade neebe kiik (Tinan 11) bele kompete ho crosser ho idade boot sira. Nia hatudu ninia talentu neebe diak tebe-tebes no halakon crosser internasional sira bainhira kompete iha Klase Bebe 2 Tak.
Xefe Estado Maior FALINTIL-FDTL, Tanente Jeneral, Domingos Raul ‘Falur Rate Laek’ neebe tur hamutuk ho Prezidente FMC, Longuinhos Monteiro no Prezidente Diretur Pertamina Timor, Beny Harto Wijaya neebe tuur iha palku Road Race nian, bolu direta Gleen hodi konversa kona ba ninia talentu nudar crosser.
Iha Xefe Estado Maior nia oin, Gleen neebe hatais ropa crosser nian hatete katak desde idade tinan 10 nia gosta halai motor ka balap motor iha estrada. Nia dehan atu dezenvolve ninia talentu nee, lor-loron nia tuir treinu balap motor iha Tasi Tolu. Rona tiha Gleen nia esplikasaun nee, Xefe Estado Maior FALINTIL-FDTL, Tanente Jeneral, Domingos Raul ‘Falur Rate Laek’ lolo kedas osan dolar atus ida iha Gleen nia liman.
Depois konversa no hetan osan US$ 100 hosi Xefe Estado Maior FALINTIL-FDTL, Tanente Jeneral Falur Rate Laek, Gleen tun hosi palku atu kompete ho crosser internasional sira iha Klase Bebek 2 Tak 115 CC-155 CC.
Gleen hatudu duni ninia talentu iha mundu balap motor. Bainhira kompete Road Race iha Klase Bebek 2 Tak, Gleen sai primeiru lugar. Iha kompetisaun nee, crosser balun monu no la konsege remata ninia leg hodi halau arena Road Race dala haat. Maibe, Gleen ho idade kiik tun dala tolu iha Klase Bebek nunka monu.
Iha meudia, Ministru Juventude, Desportu, Arte no Kultura, Nelio Isaac Sarmento too iha arena Road Race, hamutuk ho Xefe Estado Maior FALINTIL-FDTL, Tanente Jeneral Falur Rate Laek, Prezidente FMC, Longuinhos Monteiro no Prezidente Diretur Pertamina Timor, Beny Harto Wijaya, mai iha lina start nian hodi hasoru direta crosser juvenil, Gleen ho nia kolega crosser juvinil hosi Indonezia.
Ministru Juventude, Desportu, Arte no Kultura, Nelio Isaac Sarmento konversa ho sira, tanba prezensa sira nian iha eventu Road Race nee harame loron FALINTIL ba dala 48. Depois konversa ho crosser juvenil sira, Ministru Nelio Isaac, espesialmente loke Pertamina Internasional Timor Road Race 2023.
Antes nee, Prezidente Diretur Pertamina Internasional Timor, Beny Harto Wijaya akompañia hosi Corporate Secretary & Legal Representative Pertamina Internasional, Rudolfo Sinambela no Visi Prezidente FMC, Helder Vieira liuhosi konferensia imprensa iha Edifisiu PITSA, Pantai Kelapa, Dili, Kinta (17/8/2023) informa ona katak eventu Road Race nee partisipa hosi crosser atus ida resin hosi nasional no internasional.
“Ida nee eventu boot neebe Pertamina Internasional Timor kolabora ho FMC realiza hodi harame loron FALINTIL ba dala 48,” katak Beny Harto Wijaya.
Nia espera katak liuhosi eventu Road Rice nee, bele mos hetan pembalap-pembalap foun neebe bele tama iha internasional no enkoraza ba joven sira neebe iha talentu bele sai pembalap profesional.
Visi Prezidente FMC, Helder Vieira liuhosi biban nee lori FMC nia naran hakarak hato’o agradese wain ba partisipador sira, Nonu Governu Konstitusional, liuhosi Ministeriu Joventude Desportu, Arte no Kultura.
“Ami mos hakarak hato’o ami nia agradese ba Pertamina Internasional Timor neebe sai sponsor ba eventu Road Race nee. Ami nia agradese ba Banku Mandiri, Novu Turismu, Haksolok, Brother Motor, Yamaha Timor Leste, Maxis no sel-seluk neebe fo sira nia kontribuisaun hodi realiza eventu Road Race nee,” dehan Helder.
(mik/car)
