Baucau Rezistu Kazu Foun Pozitivu Nain Rua

Koordenador Forsa-Tarefa Prevensaun no Mitigasaun Surtu Covid-19 iha Timor-Leste, Rui Maria de Araujo. (Foto: STL/Donaciano Magalhães)

DILI, STLNEWS.co – Ekipa konjuta saude iha Munisipiu Baucau oras nee dadaun rezistu tan kazu konfirmadu pozitivu nain 2, neebe viajen husi Dili mai Baucau.

Tanba nee ekipa konjuta saude hahu iha dia 10 mai dia 11 Marsu foti 132 amostra, iha sira nia atividade buka tuir kontaktu besik husi kazu pozitivu iha Dili, neebe agora iha ona kantaktu balun iha Munisipiu Baucau.

Hatete Koordenador Forsa-Tarefa Prevensaun no Mitigasaun Surtu Covid-19 iha Timor-Leste, Rui Maria de Araujo ba jornalista sira liu husi konferensia imprensa, iha Sala Situasaun Sentru Integradu Jestaun Krize (SIJK), fatin CCD, Dili, Sabadu lokraik (13/03/2021).

Nia dehan atividade vijilansia sentinela, nomos atividade restoriu ba ema neebe sai husi Dili iha 8 Marsu, molok hahu serka sanitaria iha kapital Dili.

Nia dehan, serka sanitaria hahu iha kapital Dili iha 9 Marsu, oras dadersan 00:00 OTL. Antes nee ema lubuk ida aproveita sai husi Dili, posivelmente sira lori sai virus nee husi Dili ba munisipiu.

“Tanba nee iha Munisipiu Baucau sira buka tuir, ema sira nee hetan duni no halo teste, tanba nee husi amostra neebe ohin hau temi 132, iha 92 mak negativu, 37 mak sei hein rezultadu husi laboratoriu, mais iha nain rua mak pozitivu iha Baucau,” nia dehan.

Nia esplika, sira nain rua neebe pozitivu iha Baucau nee mak ida estudante medisina, neebe halo estaziu iha Hospital Referensia Eduardu Ximenes Baucau. Kazu detektadu ida seluk, hela iha Dili, nia hela iha Aldeia Munumentu Kalma, Suku Lahane Oriental, Postu Administrativu Nain Feto.

“Estudante nee pozitivu tanba kontaktu besik ho professional saude neebe ita anunsia tiha ona iha dia 10 Marsu,“ nia esplika.

Nunee mos estudante ida seluk, ema Baucau duni, no estuda iha Institutu Sensia do Saude, iha Baucau nia hela iha Aldeia Kaibilale, Suku Kaibada Baucau Villa, iha Dili nia hela iha Aldeia Fumentu III, Suku Comoro.

“Kazu positivu ida nee sai husi Dili ba Baucau, iha 8 Marsu no sae mikrolet ida ho ema lubuk ida, nia too iha Baucau iha professional saude ida vizinu ho nia, mak hatete ba nia tenke ba teste tanba imi foin sai husi Dili, keta halo lori virus nee mai iha nee,” nia informa.

Tanba estudante nee iha Dili, nia hela iha Aldeia Fumentu III, nia hela hamutuk ho nia familia rasik, ema iha familia nee mos iha kontaktu ho ema balun neebe pozitivu tiha ona.

“Ita haree didiak kazu pozitivu rua iha Baucau nee, laos kazu neebe mosu iha komunidade nian leet, maibe kazu ida neebe ligasaun ho kazu pozitivu iha Dili,” nia tenik.

Tanba nee ekipa konjuta saude ohin loron 13 Marsu rekolla hotu amostra 65, husi kontaktu besik ho ba kazu positivu sira nee.

“Depois tuir mai ita sei rona rezultadu husi 65 amostra kontaktu besik nee oinsa,” nia afirma.

Entretantu kazu foun iha nain ualu (8), nain neen (6) iha Munisipiu Dili, no nain rua (2) iha Munisipiu Baucau. Kazu neebe rekuperadu neebe teste negativu ba dala rua tui-tuir malu nee iha nain rua (2), maibe sira nain rua nee husi Fatumea, nunee kazu neebe aktivu agora iha 82, tantu ohin aumenta nain ualu (8), maibe sai nain rua (2) tanba rekuperadu ona.*

Reportajen: Jeniche da Costa/Donaciano Magalhães
Editor: Ekipa STL

LEAVE A REPLY

Please enter your comment!
Please enter your name here