Covid-19 Aumenta 37, Rekoperadu 51

Koordenador Forsa Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo. (Foto: STL/Jeniche da Costa)

DILI, STLNEWS.co – Timor Leste rejistu tan kazu Covid-19 foun hamutuk 37 inklui Munisipiu Covalima nian ida, no rekoperadu nain 51.

Informasaun nee hatoo husi Koordenador Forsa Tarefa ba Prevensaun no Mitigasaun Surtu Covid-19 iha Timor-Leste, (CIGC-SS) Rui Maria de Araújo, ba publiku liu husi konferensia imprensa iha CCD, Sabadu (03/04/2021).

“Evolusaun surtu Covid-19 iha Munisipiu Dili 36 no Munisipiu Covalima nain ida, tanba nee kazu foun 37 neebe ita rejista tan, maibe ohin rekoperadu nian 51,” hatete Rui.

Nia dehan, Dili hahu dia 7 de Marsu too dia 3 de Abril nee hamutuk nian 563, bazea ba informasaun neebe ekipa konjunta saude nian rekolla, foku/cluster kazu pozitivu iha Dili.

Nia esplika, iha Munisipiu Dili, iha cluster foun 5 no cluster 1 deklara inativu, ohin mosu fali, tanba nee total iha cluster 56 mak sei nafatin hatudu atividade hadaet virus SARS-CoV-2, husi ema ida ba ema seluk, liu-liu iha Suku Madohi, Bebonuk, Fatuhada, Comoro, Bairru Pite, Vila Verde, Motael, Kulu-Hun, Lahane Oriental, Becora.

Aleinde nee, ohin deteta kazu pozitivu ida iha Munisipiu Covalima, kazu pozitivu ida nee halo viajen husi Dili, iha dia 2 de Abril 2021, pasiente nee iha Dili hela iha Fatuhada.

Entretantu dadus jeral neebe iha, oras nee munisipiu Dili kazu foun ohin nai 37, kazu rekoperadu nain 51, nunee mos kazu ativu 447 neebe oras nee dadaun iha sala izolamentu.

Husi total kazu foun 37 nee, mane nain 25, feto nain 12, no nain 4 sintomatiku, nomos nain 33 mak iha asintomatiku.*

Reportajen: Jeniche da Costa
Editora: Josefa Parada

LEAVE A REPLY

Please enter your comment!
Please enter your name here