Dili Lockdown Semana Ida

Konsellu Ministru liu husi reuniaun extraordinaria hasai ona rezolusaun governu hodi implementa lockdown ka serka sanitaria ba munisipiu Dili durante semana ida, hahu iha loron 9 too 15 fulan Marsu tinan 2021. (Foto: Espesial)

DILI, STLNEWS.co – Konsellu Ministru liu husi reuniaun extraordinaria hasai ona rezolusaun governu hodi implementa lockdown ka serka sanitaria ba munisipiu Dili durante semana ida, hahu iha loron 9 too 15 fulan Marsu tinan 2021.

Tuir Ministru Prezidensia Konsellu Ministru (MPKM), Fidelis Leite Magalhães katak, iha reuniaun KM nee hasai rezultadu rua hanesan serka sanitaria ba munisipiu Dili nomos kalendariu roteriu vasinasaun iha teritoriu Timor Leste.

“Konsellu Ministru deside katak, hahu aban sei tama iha vigor implementa lockdown ka serka sanitaria no konfinamentu obrigatoriu ba munisipiu Dili,” dehan Ministru Fidelis, hafoin remata enkontru Konsellu Ministru iha edifisiu Ministeriu Finansa, Aitarak Laran, Dili, Segunda (08/03/2021).

Serka Sanitaria neebe implementa iha kapital Dili tuir governante nee katak, sei bandu komunidade hotu atu labele halo atividade sai husi kapital Dili, efeitu deit ba sira neebe hetan autorizasaun husi Ministeriu Interior no Sala Situasaun Sentru Integradu Jestaun Krize (SIJK) mak bele halo atividade.

Enkuantu sira neebe nia rezidensia iha kapital Dili bele tama fali mai, maibe tenki relata ba SIJK. Serka Sanitaria ba Munisipiu Dili nee mos bandu atividade kultural no Igreja durante loron 7 nia laran.

“Konsellu Ministru mos deside konfinamentu obrigatoriu ba munisipiu Dili, no la autoriza sidadaun sira atu halo atividade kulturais no relijiosa no atividade sira durante loron hitu nee nia laran,” nia esplika.

Enkuantu konaba atividade merkadoria no ensinu aprendizajen, tuir despaisu ministeriu relevante sira sei fo sai. Tanba medida estadu emerjensia (EE) fo hela dalan.*

Reportajen: Alberto Menezes
Editora: Carme Ximenes

LEAVE A REPLY

Please enter your comment!
Please enter your name here