Horta Husu Komunidade Lalika Tauk Simu Vasina Covid-19

Eis Prezidente Republika no Premiadu Nobel da Paz, Jose Ramos Horta bainhora simu vasina AztraZeneca iha Kuarta (07/04/2021). (Foto: Media Palacio das Cinzas)

DILI, STLNEWS.co – Premiu Nobel da Paz, José Ramos Horta husu komunidade sira lalika tauk simu vasina AstraZeneca, neebe governu introdus atu prevene no proteje sidadaun sira husi Covid-19, tanba iha nasaun Inglaterra ema 30 milhoens resin inklui Timoroan sira balun simu ona vasina nee, no laiha problema.

“Hau koalia ho ema barak iha mundu, ema sira koalia Ingles no Timoroan balun konaba vasina nee. Sira barak mak simu ona vasina ba dose segundu no sira hateten normal hela, klaru dala ruma hetan isin manas no isin moras, maibe nee normal vasina sempre iha reasaun tanba nee husu populasaun sira wainhira governu hahu vasina ita buka hotu-hotu simu,” hateten José Ramos Horta hafoin simu vasina dose primeiru iha edifisiu servisu saude munisipio Dili iha Formosa, Dili, Kuarta (07/04/2021).

Nia dehan, vasina deit la sufisiente atu proteje aan husi Covid-19, tanba nee maske hetan ona vasina nafatin disiplina pratika protokolu preventiva sira hanesan uza maskra, fase liman beibeik ho sabaun no bee, halo distansiamentu no evita halibur malu.

Nia hateten ema barak, liu-liu feto sira uza maskra tau fali iha kakorok nee lalos tanba virus nee ataka liu husi inus, ibun no matan laos kakorok.

Iha parte seluk, Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Doutor Rui Maria de Araújo, hatoo sentimentu previlejiu tanba tama iha grupu primeiru hamutuk ho membru governu sira simu vasina Covid-19 iha loron lansamentu.

“Hau previlejiu ida simu uluk, maibe hakarak hatoo mos ba populasaun sira labele tauk tanba vasina nee seguru. Liu husi vasina nee ita bele reforsa isin atu reziste kontra karik ita hetan infesaun husi virus nee,” nia afrima.

Nia esplika, dezastre naturais neebe akontese iha loron 4 fulan Abril, la ajuda esforsu tomak atu halo prevensaun no mitigasaun ba Covid-19 tanba situasuan nee halo ema barak lakon hela fatin no sasan sira inklui aihan.*

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here