Kazu Foun 23, Rekoperadu Nain 4

Koordenador Forsa Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo. (Foto: STL/Jeniche da Costa)

DILI, STLNEWS.co – Ohin loron 19 fulan Marsu 2021, liu husi Sentru Integrado Jestaun Krize (SIJK), fo sai katak, Timor Leste rezistu tan kazu konfirmadu positivu Covid-19 hamutuk nain 23 no rekoperadu nain 4 nomos kazu aktivu neebe baixa iha izolamentu nain 138.

Liafuan nee haktuir husi Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, (CIGC-SS) Rui Maria de Araújo ba jornalista sira liu husi konferensia imprensa iha CCD, Tersa lokraik (19/03/2021).

“Ita ohin loron rezistu tan kazu foun hamutuk nain 23, iha mane nain 8, feto nain 15, no idade entre 10 no 14 nee iha ema 3, idade entre 18 no 60 iha 20, sintomatiku 1, asintomatiku 22, tanba nee husi horisehik mai ohin loron hamutuk ita halo teste ba laboratoriu hamutuk 543,” hatete Rui.

Nia dehan, husi kazu foun 23 nee, kazu pozitivu nian 3 kontaktu ho profisional saude husi cluster Aldeia 05 ho cluster Aldeia São Miguel, Suku Comoro, neebe servisu iha HNGV, unidade hemodiálize. Depois kazu pozitivu 5 seluk nee kontaktu-besik ho profisional saude ida iha cluster EMONC (Emergency Obstetrics and Neonatal Care), nomos kazu pozitivu 7, kontaktu-besik ho kazu konfirmadu ida iha BTN III, Aldeia Terra Santa, Suku Madohi, Postu Administrativu Dom Aleixo. Nia esplika, kazu pozitivu 6, kontaktu-besik ho kazu ida iha cluster Aldeia Maucocomate, Suku Becora, Posto Administrativo Cristo Rei. Nomos kazu positivu nain 1, nee kontaktu-besik ho kazu konfirmadu ida iha cluster HNGV, hela iha Aldeia Auhun, Suku Becora, Posto Administrativu Cristo Rei. Tanba nee kazu detetadu ka pozitivu iha Munisipiu Dili husi dia 7 de Marsu 2021, too ohin 19 de Marsu de 2021, hamutuk hotu 117.

Nia tenik, kazu detetadu 117 iha Dili nee, fahe ba cluster 30, namkari iha instituisaun 4, eventu 1 no Suku 8, fatin kuarentena nian 1, iha Postu Administrativu Dom Aleixo, Vera Cruz ho Cristo Rei.

Nia apela mos ba komunidade iha munisipiu sira, wainhira hatene konaba ema ruma neebe sai husi Dili molok serka sanitaria hahu iha Dili, halo favor informa hela ba autoridade sira atu bele halo atendimentu ba sira.*

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here