Kazu Foun Mai Husi Professional Saude Tuir Treinamentu EMONC

Koordenador Forsa Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo. (Foto: STL/Jeniche da Costa)

DILI, STLNEWS.co – Kazu konfirmadu pozitivu Covid-19 hamutuk nain 5, nee mai husi professional saude tuir treinamentu Emergency Obstetrics and Neonatal Care (EMONC) iha Hospital Nacional Guido Valadares, (HNGV), maibe kazu foun nain 4.

Kestaun nee hatoo husi Koordenador Forsa Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Rui Maria de Araújo, ba jornalista sira liu husi konferensia imprensa iha Sala Situasaun SIJK, Sesta lokraik (12/03/2021).

Nia aproveita esplika ba populasaun katak, dadus neebe iha relasiona ho HNGV, hatudu katak, seidauk iha professional saude seluk tan, neebe servisu iha HNGV, mak hetan kontajiu husi kazu pozitivu ida neebe anunsía iha dia 9 de Marsu.

Tanba sira hotu neebe iha kontaktu besik ho kazu ida nee, halo hotu test ona, no iha hotu ona kuarentena.

Kontajiu neebe akontese iha unidade pediatria maternidade ninia hun mai husi liur, no seidauk hatudu katak naklekar ba unidade seluk iha hospital nia laran.

Nia dehan, maski nunee dirijente sira iha HNGV, hahu reduz ona prestrasaun asistensia médika neebe laos espesializada iha area maternidade no pediatria, durante loron 3 nia laran, tuir protokolu kontinjensia hospital nian rasik.

“Iha servisu sira seluk, hanesan emerjensia, konsulta ambulatoria, no servisu iha area espesializada seluk, nafatin funsiona hanesan baibain,” nia haktuir.

Tanba nee tuir observsaun STL iha terenu katak, ekipa saude hamutuk ho grupu voluntariu sira hahu re-ativa atividade desinfetante ba instituisaun publika sira neebe deteta kazu, no bairru sira iha kapital Dili neebe rejistu kazu positivu Covid-19, inklui mos HNGV.*

Reportajen: Jeniche da Costa/Donaciano Magalhães
Editor: Ekipa STL

LEAVE A REPLY

Please enter your comment!
Please enter your name here