La Halo Viazen Kontaktu Positivu Covid-19

Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo. (Foto: STL/Jenichw da Costa)

DILI, STLNEWS.co – Iha kazu konfirmadu Covid-19 iha Munisipiu Baucau, bazeia ba rezultadu investigasaun ekipa vizilansia katak, pasiente la halo viajen ba nasaun no munisipiu afeitadu no laiha kontaktu ho kazu konfirmadu, maibe rejultadu teste PCR iha loron 2 de Marsu 2021 hatudu positivu Covid-19.

Kestaun nee haktuir husi Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo, liu husi konferensia imprensa neebe halao iha Sala Situasaun Sentru Integrado Jestaun Krize, Sesta loraik (05/03/2021).

Nia dehan, pasiente nee halo viazen husi Dili ba Baucau iha loron 1 de Marsu, ho bis naran MABENIFA, sapa matrikula 36-806, too iha Baucau tuku 8 kalan. Nunee iha dia 2 de Marsu, vizinu sira informa kedas ba ekipa konjunta Saude Baucau nian. Tanba ema nee kleur ona la hela iha Baucau, posivelmente halo viajen ba fatin kontaminadu ruma, tanba nee ekipa husu atu atu halo test, entaun ekipa konjunta foti amostra.

“Iha loron nee kedas, ita nia ekipa vizilansia ho ema nee rasik ninia konsentimentu. Rezultadu amostra pozitivu, maibe pozitivu ho CT (cycle Threshold) 42,5” Rui dehan.

Nia esplika, ida nee signifika, pasiente nee infetadu duni ho virus SARS-CoV-2, maski nia iha ona faze rekuperasaun, no probabilidade nia atu hadat tutan ba ema seluk, kiik liu, kompara ho pur ezemplu karik nia iha CT 37 mai kraik.

Depois Iha dia 4 de Marsu, ekipa saude repete hikas analize hodi konfirma ninia CT, maibe rezultadu hatudu negativu.

Rezulatdu ida nee konfirma katak, kazu ida nee iha duni prosesu rekoperasaun.

“Pasiente nee hela iha Dili, iha BTN II Tasitolu, Aldeia Terra Santa, Suku Madohi, Dili, maibe ita nia ekipa hatete, nia hamutuk hotu iha ema nain 17 (nain 9 iha Baucau, nain 8 iha Dili), neebe konsideradu kontaktu besik ho kazu ida nee, maka ita halo ona teste. Rezultadu hatudu negativu hotu kedas,” nia infroma.

Nia tenik, maski negative hotu kedas, sira hotu sei nafatin iha kuarentena Tasitolu, hodi hein tempu neebe nesesariu atu repete test dala ida tan.

Nia esplika, kazu konfirmadu foun ida nee, nomos ninia membru familia sira hateten katak, sira ida mos la halo viajen sai husi Timor-Leste, no la halo mos viajen ba fatin neebe foin dadaun iha hela serka sanitária, hanesan Munisipiu Bobonaro.*

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here