Munisipiu Ermera Kazu Foun Rua

Koordenador Forsa-Tarefa ba Prevensaun no Mitigasaun Surtu Covid-19.iha Timor-Leste (CIGC-SS) Rui Maria de Araújo. (Dok: STL)

DILI, STLNEWS.co – Ohin loron 1 fulan Abril tinan nee, liu husi Centru Integrado Gestão de Crises, Sala Situação (CIGC-SS) fo sai ba publiku katak, munisipiu Ermera foin primeira ves rezistu kazu pozitivu Covid-19 nian 2.

Tuir Koordenador Forsa-Tarefa ba Prevensaun no Mitigasaun Surtu Covid-19 iha Timor Leste, (CIGC-SS) Rui Maria de Araújo ba jornalista sira liu husi Zoom Call iha CCD, Kinta (01/03/2021).

“Ohin ita deteta kazu pozitivu nian 2 iha Munisipiu Ermera, kazu pozitivu 2 nee halo viajen husi Dili ba Letefoho,” tenik Rui.

Nia dehan, iha dia 26 Marsu nia viajen husi Dili ba Letefoho, depois pasiente nee iha Dili, sira hela iha aldeia Golgota, Suku Comoro, Postu Adiministrativu Dom Aleixo, tanba nee ekipa konjunta saude sei buka tuir hela kontaktu besik sira hotu.

Iha biban nee, Rui mos apela ba populasaun Timor Leste tomak, liu-liu Munisipiu Dili, Munisipiu Baucau, Viqueque nomos Ermera, atu nafatin hakmatek.

Wainhira kumprimenta malu, lapresiza kaer liman, bensa liman, rei malu ka hakuak malu, evita halibur malu barak, hamriik ka tur dook husi ema seluk, minimu metru ida ho balun.*

Reportajen: Jeniche da Costa
Editora: Domingas Gomes

LEAVE A REPLY

Please enter your comment!
Please enter your name here