Sai Ema Daruak Vasina Iha TL, Aniceto: Hau Diak Hela, Povu Lalika Tauk

Prezidente Parlamentu Nasional (PPN) Aniceto Guterres, sai hanesan ema daruak ba vasina prevene Covid-19 iha Timor Leste, hafoin Primeiru Ministru (PM) Taur Naran Ruak nuudar ema dahuluk. (Foto: STL/Donaciano Magalhães)

DILI, STLNEWS.co – Prezidente Parlamentu Nasional (PPN) Aniceto Guterres, sai hanesan ema daruak ba vasina prevene Covid-19 iha Timor Leste, hafoin Primeiru Ministru (PM) Taur Naran Ruak nuudar ema dahuluk, tanba nee PPN husu atu sidadaun hotu labele paniku, tan vasina nee diak.

Hafoin simu vasina Covid-19, Kuarta nee (07/04/2021) PPN hatete, Ministeriu Saude foti medidas serka sanitaria ho regras sira seluk tan nee para atu obriga populasaun hotu komporta aan, ba prevensaun Covid. Komportamentu neeba lai hela mak programa vasina, mezmu laos aimoruk atu livre husi Covid, maibe ida nee mos importante, atu aumenta imunidade atu Covid labele ataka.

“Klaru laperfeitu 100%, maibe mundu tomak agora uza vasina ho marka oin-oin, maibe TL hili tipu AstraZeneca. Hau simu tiha ona vasina nee hau diak hela, tanba kiik kedas toman vasina nee, mezmu kiik sente moras, maibe ida agora nee vasina diak loos hau lasente buat ruma. Hau husu ba sidadaun sira lalika tauk, tanba nee husu atu bele partisipa iha programa nee, neebe labele fiar informasaun hoax sira konaba programa vasina nee,” katak PPN.

Nia dehan, nuudar PPN konvida sidadaun hotu atu partisipa i kolabora ho programa governu ida nee, atu sidadaun hotu iha estadu ida nee bele kontrola covid. Atu kombate total ba halakon lae, maibe bele kontrola atu nia alastrasaun nee labele barak liu.

Reportajen: Guilhermina Franco/ Donanciano Magalhães
Editor: Ekipa STL

LEAVE A REPLY

Please enter your comment!
Please enter your name here