TL Rezistu Tan Kazu Postivu Covid-19 Nain 1

Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste (TL), Rui Maria de Araújo. (Foto: STL/Jeniche da Costa)

DILI, STLNEWS.co – Ohin loron Timor-Leste (TL) rezistu tan kazu konfirmadu positivu nain ida, ema nee hela iha Aldeia Onu-laran, Suku Maudemu, Postu Administrativu Tilomar, Munisipiu Covalima.

Tanba nee loron 27 Fevereiru 2021, hodi Sala Situasaun Sentru Integradu Jestaun Krize (SIJK) konfirma ba publiku katak, ekipa konjunta vijilansia epidemiolojika no laboratoriu, kontinua halo rastreiu iha Aldeia Klauhalek, Suku Belulik leten, Postu Administrativu Fatumea, Munisipiu Covalima, no rekolla tan amostras husi ema neebe kontaktu besik ho kazu primariu Klauhalek.

Hatete Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste (TL), Rui Maria de Araújo ba jornalista sira liu husi konferensia imprensa iha Sala Situasaun Sentru Integradu Jestaun Krize, Sabadu (27/02/2021).

Nia dehan, iha loron 25 no 26 Fevereiru 2021, ekipa konjunta vijilansia epidemiolojika no laboratoriu, kontinua halo rastreiu iha aldeia Klauhalek, suku Belulik leten, Postu Administrativu Fatumea, Munisipiu Covalima, no rekolla tan amostras husi ema neebe kontaktu besik ho kazu primariu Klauhalek.

Nia esplika, iha prosesu rastreiu ba kontaktu besik ho KPK horiseik, hetan informasaun adisional katak KPK halo mos kontaktu ho ninia belun balu iha Tilomar.

“Ita nia ekipa hafoin buka tuir i hetan duni sira, hafoin halo analize laboratoriu, hetan rezultadu pozitivu ida 1,” dehan Rui.

Nia esplika, kazu konfirmadu foun ida nee, mane, idade tinan 42, servisu nuudar estensionista, hela iha Aldeia Onu-laran, Suku Maudemu, Postu Administrativu Tilomar, halo kontaktu ho KPK entre 11 ho 13 Fevereiru 2021.

Eis Primeiru Ministru nee dehan, kazu konfirmadu foun nee informa katak nia seidauk halo viajen sai husi Covalima, maibe iha kontestu halao ninia knaar nuudar estensionista, nia halo kontaktu ho kolega servisu, ho mos superior hierarkiu iha servisu munisipal agrikultura, Covalima nian. inklui mos ho populasaun balun iha Tilomar ho Fatumea.

“Tanba nee ohin loron ita rezistu tan kazu foun ida, ida nee hamosu indikasaun katak, transmisaun lokal iha agrupamentu/cluster ,” nia tenik.

Nia informa, hadaet tutan, ka espalla ona too Aldeia Onu-laran, Suku Maudemu, Tilomar, no iha mis possibilidade hadaet ka espalla ona iha Suai Vila, ho fatin seluk tan iha Covalima nia laran.

Nia afirma, ekipa konjunta husi vijilansia epidemiolojika nivel nasional, laboratoriu nasional saude, servisu Munisipal Saude hamutuk ho autoridade administrativa Covalima, neebe integra iha Unidade Territorial SIJK, Munisipiu Covalima nian, oras nee dadaun hatun ekipa 4, hodi buka tuir ona ema hotu neebe halo kontaktu besik ho kazu foun ida nee.

Entretantu liu husi oportunidade nia hakarak informa mos publiku tomak katak, informasaun neebe loron rua nia laran sirkula sai iha media sosial, konaba estudante iha Liquiça, no mos funsionariu obras publika dehan katak, pozitivu, informasaun hirak nee hotu la loos.

Tanba husu ba populasaun tomak atu rona, no fiar deit maka informasaun neebe Governu foo sai, liu husi Sentru Integradu Jestaun Krize. Nia mos apela ba populasaun iha Salele, Suai Vila no Covalima nia laran tomak, atu labele paniku. Favor tuur hakmatek iha ida-idak nia fatin, lalika lao ba mai lai, foo tempu atu ekipa saude ho ekipa konjunta Unidade Territorial SIJK, Munisipiu Covalima, buka tuir kontaktu sira hotu, no foti tan amostra hodi bele halo test. Apela mos ba populasaun Timor-Leste tomak, atu nafatin matan-moris neon nain, pratíka nafatin medida sira neebe ita hotu hatene ona.

“Tanba nee ita tenke uza maskra, fase liman beibeik no sabaun ka dezinfetante ruma, wainhira kumprimenta malu, lapresiza kaer liman, bensa-liman, rei-malu ka hakuak malu, evita halibur malu barak, hamriik ka tuur dook husi ema seluk, mínimu metru ida ho balun,” nia afirma.*

Reportajen: Jeniche da Costa
Editor: Ekipa STL

LEAVE A REPLY

Please enter your comment!
Please enter your name here