Antisipa Covid-19, Aumenta Seguransa iha Fronteira

DILI, STLNEWS.co – Covid-19 iha nasaun vizinu liu liu NTT (Indonezia), rezistu makas no hamate ona ema, tanbe nee atu antesipa surtu nee labele hadaet mai iha rai laran, governu presiza aumenta seguransa ba area fronteira.

Ejijensia nee hatoo husi Program Officer Asia Justice and Rights (AJAR), Inocencio Xavier ba STL iha nia knaar fatin Farol, Dili, Tersa (19/01/2021).

Nia dehan sosiedade sivil tomak hanoin katak, alternativu neebe diak maka governu tenki reforsa tan forsa hodi asegura fronteira atu labele autoriza ema tama iha rai laran, nunee hodi evita labele hamosu transmisaun lokal, tanba corona virus laos mosu iha Timor, tanba wainhira moras importadu maka tenke blokeia odamatan sira, tasi rai maran no lalehan, atu nunee laiha ema ruma tama hodi lori moras nee mai iha ita nia rai.

“Ami hanoin katak laos sosiedade sivil AJAR deit maibe sosiedade sivil tomak hanoin katak, alternativu neebe diak maka governu tenki reforsa tan forsa hodi asegura fronteira atu labele autoriza ema tama iha rai laran,” dehan nia.

Nia dehan, ho alternativu neebe uza atu nunee komunidade sira iha rai laran kontinua halo sira nai atividade no kontinua halo movimentasaun ekonomia, tanba moras nee laos iha Timor, tanba nee maka governu tenke haruka no tau seguransa barak hodi destaka iha fronteira, hodi bele asegura ema labele tama, no labele autoriza aviaun lebele tama hodi lebele lori pasageirus mai.

“Ita bele autoriza sasan deit liuliu hahan nesesidade baziku sira neebe ita presiza, sira neebe laos nesesariu ba governu lapresija atu lori tama, ida nee maka alternativu ida neebe atu evita moras nee,” dehan nia.

Inocencio hatutan, prevensaun sira fase liman uza maskara distansiamentu fiziku no sosial ida nee diak, maibe sei lakonsege asegura moras nee, wainhira atividade iha fronteira kontinua tama no sai.

“Ami sujere ba seguransa rua F-FDTL no PNTL atu bele halo patroliamentu forti no destaka profisional saude sira iha fronteira hodi hare ema sira neebe sei konsege tama, halo kedas karantina iha neeba, no se maka kontra bandu ida nee, kriminaliza nia no laos deit iha administrasaun maibe bele halo prizasaun ba nia,” Inocencio afirma.*

Reportajen: Santina Castro
Editora: Carme Ximenes

LEAVE A REPLY

Please enter your comment!
Please enter your name here