Brigadeiru Jeneral “Aluc Descartes”: Posibilidade Governu Extende Estadu Emerjensia

Diretor Sentru Integradu Jestaun Krize (SIJK), Brigadeiru Jeneral João Miranda "Aluc Descartes" (Photo: STL News/Alberto Menezes)

DILI, STLNEWS.co – Diretor Sentru Integradu Jestaun Krize (SIJK), Brigadeiru Jeneral João Miranda “Aluc Descartes”, informa moras pandemia Covid-19 dadaun ne’e, iha nasaun vizinu kontinua sae, nune’e wainhira situasaun ne’e nafatin mantein mak posibilidade ba governu atu bele extende tan estadu emerjensia.

Nia dehan, Primeiru Ministru (PM) Taur Matan Ruak, konvida nia atu koalia konaba situasaun Covid-19, ne’ebé dadaun ne’e lao iha Timor Leste. Iha situasaun emerjensia ne’e Timor Leste iha kazu foun Covid-19 ida, maibe pasiente ne’e ho kondisaun ne’ebé diak.

“Hau labele adiante, sei diskusaun iha Konsellu Ministru, tanba ne’e ita hotu hein, no sei hare katak evolusaun situasaun nafatin mantein hanesan ne’e, bele extende tan estadu emerjensia,” dehan Diretor Sentru Integradu Jestaun Krize (SIJK), Brigadeiru Jeneral Joao Miranda “Aluc Descartes,” hafoin remata enkontru ho Xefe Governu Taur Matan Ruak, iha Palasiu Governu, Dili, Segunda (24/08/2020).

Brigadeiru Jeneral João Miranda “Aluc Descartes” afirma, maske Timor Leste iha Kazu Covid-19 foun ida deit, maibe nasaun vizinu sira ne’e intensidade kazu Covid-19 kontinua sae.

“Por que ita hotu hatene katak, mesmu iha ita nia rain kazu positivu ida deit, moras pandemia Covid-19 nee iha nasaun vizinu sira intensidade sei makaas, tamba ne’e fó atensaun ba ita oinsa atu implementa medidas konaba prevensaun, tanba ne’e dala ruma sei extende tan estadu emerjensia, nune’e ema hotu bele hakmatek ,” dehan Brigadeiru Jeneral “Aluc Descartes”.

Tuir nia, diak liu prevene, tamba nasaun ne’ebé dadaun ne’e dezenvolvidu, maibe to’o agora seidauk deskobre aimoruk/vaccine konaba moras Covid-19 ne’e.

Reportajen: Alberto Menezes

Editor: Ekipa STL

LEAVE A REPLY

Please enter your comment!
Please enter your name here